Propozimi i ish-ministrit të Shëndetësisë, Ilir Beqja për uljen e pensioneve dhe pagave, është bërë pjesë e debateve në Parlament.
Deputeti Andi Përmeti e cilësoi si të pashpirt dhe të çmendur ish-ministrin, madje tha se ka ikur nga mendorja.
“I propozoj kryeministrit shtimin e një tjetër mase sigurie, duke falenderuar doktorët në hyrje, i propozoj që te dera të shtojë një mjek psikiatër. Koha e karantinimit është e vështirë mendërisht dhe nga salla vë re dikë që ka pasur një çrregullim dhe mendon se mbase është kohë stresi dhe ankthi për të gjithë. Pastaj e dëgjon që propozon uljen e pagave dhe pensioneve dhe ky ka ikur nga mendorja. Zoti Beqja mendoj se keni nevojë. Të bësh këtë propozim duhet të jesh ose i çmendur ose i pashpirt. Nëse e ka bërë nga mendja e tij i këshilloj që të kujdeset për shëndetin e tij” tha ai.
Ndërsa Beqja për të sqaruar propozimin e tij mori shembull dy ish-deputetë të LSI, Petrit Vasilin dhe Klajda Gjoshën, të cilët vijojnë të marrin pagat si deputetë.
“Se cfarë unë kam shkruar mund ta lexoni, nuk jam marrë me pensionistët fare. Nuk jam marrë me pensionet, propozimi im, që pensionisti Petrit Vasili të mos marrë pension 840 mijë lekë, por 630, pse është i pamoralshëm. Që Klajda Gjosha të mos marrë 900 mijë lekë, por 670 mijë lekë pse është kriminale kjo? Të gjithë ata që janë në ballë të luftës të mos preken. Merr lexo, ato që të çojnë me plagjiatura mund ti recitosh këtu” tha Beqja.
