Pritet që qeveria të ndryshojë ligjin për armëmbajtjen në vendin tonë duke ulur moshën për lejet e armëve nga mosha 25 në 22 vjeç.
Autorizimet për mbajtjen e armëve me leje do të kenë afat 5-vjeçar dhe do të rishikohen në përfundim të çdo afati.
Lejohet të pajisen me autorizim për armë të shkurtra të kategorisë “B”, personat që për shkak të detyrës shtetërore ose të rrethanave personale të veçanta janë të ekspozuar ndaj rrezikut për jetën dhe u njihet e drejta e mbrojtjes së veçantë.
Ligji i ri parashikon gjithashtu lejimin e armëve të vërteta për realizimin e filmave dhe videoklipeve, por për të cilat duhet të merret një autorizim i posaçëm.
Kosto fillestare nga buxheti i shtetit për regjistrimin e armëve në pronësi të shtetasve është 55 milionë lekë për prodhimin e autorizimeve digjitale për mbajtjen e armëve. Ministria e Brendshme thotë se ka parashikuar regjistrimin e 100 mijë armëve me kosto 550 lekë për njësi. Përfitimi i mundshëm nga regjistrimi do të jetë 200 milionë lekë për shkak se një autorizim digjital kushton 2 mijë lekë.
Ndërkohë projektligji ka dalë për konsultim publik dhe sipas relacionit të qeverisë ka për qëllim përafrimin me kuadrin ligjor të Bashkimit Europian.Lejet dhe licencat jepen nga Policia e Shtetit.
