Shqipëria u trondit mbrëmë nga një aksident fatal automobilistik ku humbën jetën dy femra.
Një shofer i dehur goditi mjetin ku po lëviznin katër vajza të reja dhe për pasojë dy prej tyre humbën jetën dhe dy të tjera janë plagosur dhe janë në gjendje të rëndë.
Por teksa në Shqipëri po mendohet që të rriten sërish gjobat dhe masat penalizuese për qarkullimin rrugor, në Britaninë e Madhe po shkojnë edhe më larg.
Sipas BBC, shoferët që vrasin të tjerët në aksident mund të dënohen me burgim të përjetshëm.
Ky është një propozim i ri, pasi deri tani dënimi maksimal ishte deri në 14 vite heqje lirie, por që shpesh kjo konvertohej edhe në masa më të lehta.
Sipas propozimit që tashmë ka shukuar edhe në parlament, kush vret të tjerët pasi nget makinën me shpejtësi, është duke bërë gara, përdor celularin në timon, apo është nën efektin e alkoolit ose drogës, do të kyçet përgjithmonë në qeli.
Propozimi vjen pasi vetë opinioni publik kërkoi dënime më të ashpra për ata që shkaktojnë aksidente vdekjeprurëse.
Qytetarët britanikë janë të mendimit se shumë drejtues automjetesh janë arrogant në sjelljen e tyre në qarkullimin rrugor.
Ata mendojnë se rruga është një hapësirë publike e cila nuk është vetëm në funksion të drejtuesve të automjeteve, por ka një mori qëllimesh dhe funksionesh, prandaj për pasojë u shërben në radhë të parë qytetarëve.
Sipas BBC, qytetarët britanikë janë të mendimit se ata që përdorin në mënyrë arrogante rrugën, ose ekspozojnë në të sjellje të pahijshme kanë kryer jo vetëm një kundërvajtje rrugore, por një vepër penale.
BBC i referohet ankesave të panumërta të qytetarëve britanikë dhe raportimeve të tyre në polici, kur ata konstatojnë në plot raste drejtues automjetesh që ngasin duke folur në telefon.
Kjo gjë për qytetarët britanikë është ekujvalente me dëshminë okulare të një personi kur shikon në rrugë një person të armatosur, ose që po kryen një grabitje ose akt terrorist.
Për këtë qëllim në Britani po kërkohet me insitim ashpërsimi deri ekstrem i masave që duhet të ndëshkojnë drejtuesit e papërgjegjshëm të automjeteve gjatë drejtimit të tyre.
/Burimi: BBC/ Përshtati: GazetaReforma.com/
