Prokuroria ka përfunduar hetimet për vrasjen e 42-vjeçarit Egli Proga, i cili humbi jetën më 10 gusht 2024 në Pogradec.
Për këtë ngjarje, Denis Meçe akuzohet për vrasje me dashje.
Sipas hetimeve, ngjarja ka ndodhur pranë lokalit “Stropcka”, rreth 20 metra nga vendi ku Proga kishte lokalin e tij.
Pas mbylljes së biznesit rreth orës 18:30, ai është parë duke kaluar përpara një dyqani frutash dhe më pas është futur në lokalin ku ndodhi përplasja fatale.
Në atë moment, në ambientin e jashtëm të lokalit ndodheshe autori i dyshuar dhe dy persona të tjerë, të gjithë në gjendje të dehur.
Brenda lokalit ishte ulur një tjetër shtetas, gjithashtu duke konsumuar pije. Proga fillimisht u ul në tavolinë me këtë person, por më pas nisi një debat me grupin që ndodhej jashtë, pasi Meçe iu afrua dhe kërkoi një cigare.
Situata u tensionua kur Meçe u ngrit dhe iu afrua Progës për të kërkuar sqarime.
Debati vijoi jashtë lokalit, ku autori dyshohet se ka goditur Progën me grusht. Ky i fundit u rrëzua në tokë, duke u përplasur më parë në një automjet.
Nga të dhënat e mbledhura deri më tani, policia ka konfirmuar se mes autorit dhe viktimës nuk ka pasur konflikte të mëparshme apo probleme të tjera.
Gjatë hetimeve janë marrë në pyetje shtatë persona, ndërsa për tre prej tyre është hapur procedim penal për moskallëzim krimi. Mes tyre është edhe Voltan Shulku, pronari i lokalit ku ndodhi ngjarja.
Një nga dëshmitarët kryesorë, i identifikuar me inicialet A.Sh., ka deklaruar se Proga ishte në gjendje të dehur kur hyri në lokal dhe fillimisht bënte shaka me Meçen.
Por situata ndryshoi kur filluan ofendimet ndaj autorit, i cili më pas e ftoi Progën të dilnin jashtë për t’u sqaruar, ku dhe ndodhi goditja fatale.
Kushëriri i viktimës, A.B., ka treguar se ndodhej rreth 30 metra larg dhe pa momentin kur një person goditi me grusht dikë tjetër, i cili më pas u rrëzua.
Ai shtoi se nuk ndërhyri, por pa pronarin e lokalit, Voltan Shulku, që i ofroi ndihmë të dëmtuarit.
Edhe tre dëshmitarë të tjerë pronari i lokalit Voltan Shulku, Arian Manellari dhe Leonidha Guçe kanë pohuar se nuk e kanë parë momentin e konfliktit, por shkuan pranë viktimës kur dëgjuan të bërtitura.
