Prokuroria e Elbasanit ka përfunduar hetimet dhe ka dërguar në gjyq 13 persona, të akuzuar për veprat penale të ‘prostitucionit’ dhe ‘shfrytëzimit të prostitucionit’.
Në kuadër të procedimit penal nr.1461 të vitit 2024, u zbuluar dhe godit një rrjet i organizuar që rekrutonte, transportonte dhe vendoste në Shqipëri vajza të huaja, kryesisht nga Amerika Latine dhe vende të tjera, për të ushtruar aktivitetin e prostitucionit kundrejt pagesës.
Gjatë aksionit u sekuestruan prova të rëndësishme, përfshirë para të shënuara, telefona dhe komunikime komprometuese, që vërtetuan strukturën dhe mënyrën e funksionimit të këtij rrjeti kriminal.
Në total, 13 të pandehur u dërguan për gjykim, përfshirë:
• 2 organizatorë të dyshuar për “shfrytëzim prostitucioni” në rrethana të rënduara;
• 2 klientë që kanë përfituar shërbime seksuale kundrejt pagesës;
• 8 shtetase të huaja nga Amerika Latine, akuzuar për ushtrimin e prostitucionit në Shqipëri;
• 1 person i përdorur për shfrytëzim.
Veprimtaria kriminale operonte në disa qytete të vendit dhe përfshinte përdorimin e platformave online ndërkombëtare për prezantimin e eskortave, ku përmes publikimit të fotografive dhe tarifave realizohej kontakti me klientët vendas dhe të huaj.
Prokuroria e Elbasanit theksoi se ka dokumentuar në detaje jo vetëm funksionimin e rrjetit, por edhe bashkëpunimin e ngushtë mes të përfshirëve. Institucioni vijon të ndjekë me vendosmëri çdo hap të mëtejshëm, për t’u siguruar që të gjithë përgjegjësit të sillen para drejtësisë.
Pas dorëzimit të dosjes në gjykatë, pritet të hidhet shorti për trupën gjykuese dhe të caktohet data e seancës paraprake.
