Presidenti i Shqipërisë, Ilir Meta, ka kërkuar nisjen e menjhershme të hetimeve në lidhje me kërcënimin e prokurorit të Përmetit, Asllan Bajrami.
Në një status në rrjetin social “facebook”, Meta e konsideron një akt shumë të rëndë ngjarjen e sotme dhe kërkon dënimin e përgjegjësve. Kreu i Presidencës thekson se revanshi që ka marrë krimi, kërkon masa të menjëhershme.
“Kërcënimi për shkak dhe në krye të detyrës i Prokurorit të Përmetit, z.Asllani Bajrami, është një ngjarje tepër e rëndë dhe e dënueshme. Nevojitet një hetim i shpejtë për vendosjen para ligjit të kujdo, që guxon të kërcënojë përfaqësuesit e shtetit, për t’i penguar ata të ushtrojnë detyrën të pandikuar.
Revanshi i krimit kërkon masa të menjëhershme efektive, reaguese dhe parandaluese, nga të gjitha institucionet e ngarkuara me ligj për mbrojtjen e rendit dhe të sigurisë publike,”– shkruan presidenti i Shqipërisë, Ilir Meta.
Sot në mëngjes, në dritaren e zyrës së tij, prokurori Asllan Bajrami gjeti disa plumba. Ai ka dhënë dëshminë para grupit hetimor që ka nisur hetimet dhe është shprehur se nuk dyshon tek askush pasi nuk ka armiq. Bajrami ka deklaruar gjithashtu se ai ka marrë edhe telefonata me numër të fshehtë. Mbetet për t’u parë se si do të vijojnë hetimet për këtë ngjarje.
