Teksa këtë të enjte është seanca e fundit për këtë sesion parlamentar ku priten të miratohen disa projektligje të qeverisë për kanbisin dhe për zgjatjen e mandatit të kreut të Akademisë së Shkencave. Ish-kryeministri Sali Berisha ka reaguar ashpër, pasi krahas projektligjeve të cilat ai shprehet se janë bërë në kundërshtim me kushtetutën, mazhoranca refuzoi mocionin me debat me kryeministrin Rama.
Ai tha se mosfutja në rend të ditës të mocionit me debat me Ramën, është akt u turpshëm.
“Kushtetuta e parlamentit thotë në mënyrë tekstuale, se një ligj nuk mund të hyjë në rend dite pa kalaur 48 orë. Ti kryen një shkelje të rëndë ligjore të barabartë me banditët Rraja që rrihni qytetarët me shkopa bejsbolli. Si mund ti lejosh vetes ti, një gjë të tillë. Nëse ju doni të bëni këtë gjë, ndryshoni rregulloren e parlamentit me procedurën e saj, dhe pastaj zbatoni marrëveshjen Rama-Doshi, Doshi-Rama dhe Gjinushi. Por ky është i turpshëm, është një akt i turpshëm kjo që bëni. Ky është një provokim i ulët, një shkelmim i ligjeve.
Kur kryetarja e parlamentit që duhet të jetë mbrojtëse, zbatuese kryesore e rregullores, apo kushtetutës së parlamentit e shkelmon atë me dy këmbët, për interesat e Skënder Gjinushit, Tom Doshit dhe Edi Ramës, ky është fundi i këtij parlamenti.”, tha Berisha.
