Në një lidhje të drejtpërdrejtë mëngjesin e sotëm në emisionin “Koha për t’u zgjuar” në News24, këshilluesi i mjekësisë holistike, Nikola Ndoni, ngriti shqetësimin për problemet e shumta që lidhen me zorrën e trashë, të cilat, sipas tij, janë gjithnjë e më të përhapura dhe në disa raste kanë pasur pasoja fatale.
Ndoni theksoi se shëndeti i zorrëve është thelbësor për funksionimin e të gjithë organizmit, pasi çdo shqetësim në këtë sistem ndikon drejtpërdrejt në funksione të tjera jetike të trupit.
“Problemi është shumë më i thellë dhe nis që nga goja, Hipokrati ka thënë që të gjitha problemet nisin nga zorra”, deklaroi Ndoni, duke shtuar se bëhet fjalë për një “epidemi”, e cila shfaqet përmes simptomave si fryrje, sëmundje autoimune, mungesë energjie dhe pafuqi gjatë ditës.
Ai theksoi se ndër faktorët më të dëmshëm për shëndetin e zorrëve janë sheqernat dhe ushqimet e përpunuara.
“Duhet pasur kujdes sepse sheqerat dëmtojnë zorrët. Duhet të përdorim produktin bimor, por me kujdes në sasi”, tha Ndoni.
Sipas tij, riparimi i dëmeve në sistemin tretës mund të nisë duke eliminuar plotësisht nga dieta disa produkte shumë të përdorura: “Dëmin që iu është bërë tashmë zorrëve mund ta riparojmë duke eliminuar sheqerin, vajërat vegjelatë, alkolin, ushqimet e përpunuara, glifosajtin, të gjitha medikamentet që përdorim gjerësisht si karamele, acidblocker, medikamentin që marrim për rregullimin e aciditetit të stomakut, antibiotikët, që sjellin dëmin më të madh që mund të ndodhë në zorrë.”
Për sa i përket ushqimeve të rekomanduara, Ndoni sugjeroi kthimin tek produktet natyrale, veçanërisht te mishi: “Ushqimi real që duhet të konsumojmë është për shembull mishi”, përfundoi ai.
