Kryeministri Edi Rama ka thënë se ishte një privilegj që kancelarja Angela Merkel ishte sot në Tiranë, në pamundësi për të vizituar vendet e tjera. Ai i shprehu mirënjohjen Merkelit dhe falenderimet në emër të shqiptarëve, për atë që Gjermania ka bërë për Shqipërinë. Rama tha se Ballkani sot është një vend shumë më i mirë nga ç’ishte para se Merkel të niste procesin e Berlinit.
“Sot ishte privilegj që kancelarja të ishte në Tiranë, në pamundësi për të vizituar gjithë vendet, dhe këtu të kishim edhe takimet bilaterale me gjithë liderët. Dua t’i shpreh mirënjohjen, falenderimit në emër të shqiptarëve, për atë që Gjermania ka bërë për Shqipëri dhe kancelarja personalisht ka bërë për rajonin.
Duke respektuar maksimalisht faktin që kancelarja është një lider që drejton Gjermaninë prej shumë e shumë vitesh por asnjëherë s’ka munguar t’i japë zemër politikës, por është gjermane dhe kohën e ka të shtrenjtë oraret të rëndësishme, s’dua të marr kohë më të gjatë. Sot Ballkani është një vend shumë më i mirë sec ishte para se Merkel të niste procesin e Berlinit, pavarësisht se do të ketë vazhdimësinë, Merkel do i mungojë këtij rajoni.” tha Rama.
më tej, ai shprehu sërish mirënjohje për kancelaren, ndërsa tha se ishte një privilegj të ishte në detyrë në një kohë me të dhe të mësonte prej saj.
“Mirënjohje e falenderime, ishte një privilegj, nder kënaqësi që unë të kisha këtë detyrë në të njëjtën kohë me të, të kisha mundësinë të mësoja prej saj. Sipas meje, sot është një moment kur të gjithë ne jemi të vetëdijshëm qoftë për cfarë ka bërë e qoftë për boshllëkun që ajo lë. Pa kancelaren Merkel Ballkani nuk do ishte njësoj si sot, as Europa pavarësisht sfidave e problemeve që mbeten të pazgjidhura”, u shpreh kryeministri.
Rama e ftoi Merkelin të ftojë sërish Ballkanin Perëndimor, duke qenë se në vazhdim do të jetë më e lirë pasi të lërë detyrën si kancelare.
