Privatizimi i bregdetit shqiptar vitet e fundit është kthyer në një problem të madh për qytetarët e thjeshtë të vendit tonë, që vuajnë për hapësira publike për të ngulur një çadër, në pamundësi ekonomike për të paguar ditë për ditë çmimet e kripura të shezlongeve. Gjithmonë e më shumë shqiptarët po largohen nga pushimi në vijën bregdetare shqiptare, pasi çmimet e larta dhe “kushti” për të paguar për gjithçka, është e tepërt.
Si kurrë më parë, qytetarëve shqiptarë iu bie më lirë të pushojnë jashtë vendit, sesa në vendlindjen e tyre. Problemet me vijën bregdetare shqiptare vihen gjithmonë e më shumë në dukje gjatë sezonit turistik.
Në një lidhje në Skype me emisionin “Breaking” në Top Channel, ish-ministri i Brendshëm, Sandër Lleshaj, deklaroi se me kryebashkiakun e Lezhës Pjerin Ndreu, ka patur divergjenca, por jo konflikt. Shkak kryesor i mosmarrëveshjeve mes tyre, ka qenë pikërisht menaxhimi i bregdetit.
“Nuk kam patur konflikte të natyrës politike, e as personale. Unë kam shërbyer për një periudhë si drejtues politik në qarkun e Lezhës, kam disa standarde që nuk i thyej, ka patur divergjenca në qëndrimi, por jo konflikte. Nuk kam patur ndonjë bashkëpunim të thellë, pasi kemi qenë në pozicione të ndryshme. Kam patur divergjenca, padyshim kam patur divergjenca. Qëndrimi për menaxhimin e bregdetit. Aty kemi patur divergjenca. Unë vazhdoj të kem qëndrim ndryshë për vijën bregdetare. Mendoj që duhet t’i shërbejë publikut”, tha mes të tjerash Lleshaj.
