Një skemë mashtrimi është zbuluar nga Policia në Lezhë, ku një grua 33-vjeçare nga Tirana dyshohet se ka përfituar kredi në mënyrë të paligjshme duke përdorur të dhënat personale të qytetareve të tjera.
E arrestuara, D.C., prezantohej si përfaqësuese e një shoqate bamirësie për nëna me fëmijë të mitur dhe mashtronte gratë duke u premtuar ndihma financiare mujore.
Pasi fitonte besimin e tyre, ajo fotografonte kartat e identitetit të viktimave dhe më pas, duke përdorur të dhënat e tyre, aplikonte për kredi në institucione të ndryshme financiare, duke përfituar shuma të ndryshme parash në llogarinë e saj.
Operacioni policor i koduar “Kredia” u finalizua pas administrimit të 16 kallëzimeve nga qytetare të ndryshme që dyshonin se ishin mashtruar. Si provë materiale, policia ka sekuestruar dokumente bankare që tregojnë transfertat e kryera përmes skemës mashtruese.
Hetimet po vijojnë për të zbardhur plotësisht aktivitetin kriminal dhe për të identifikuar persona të tjerë të përfshirë në këtë rrjet mashtrimi. Materialet janë referuar Prokurorisë së Lezhës për vijimin e procedurave ligjore.
