Edi Rama ka një problem me gjyqësinë. Jo vetëm me SPAK-un që po heton anëtarë të qeverisë së tij, por me konceptin e një gjyqësori të pavarur që guxon të vendosë pa u konsultuar me të.
Gjykata Kushtetuese vendosi të lërë në fuqi pezullimin e Belinda Ballukut nga detyra. Rama reagoi menjëherë duke e cilësuar vendimin “të paparë dhe të padëgjuar në botë”. E njëjta ditë, ai sulmoi Prokurorinë e Durrësit për 33 urdhër-arreste për çështjen e Kurum-it, duke i quajtur “lajthitje”. Po atë ditë, ai doli sërish për të sulmuar gjyqtarët për rritjen e pagave, duke e cilësuar atë “unike në botë”.
Ndërkohë që Rama qëndron pas ekranit dhe denoncon gjyqësinë, mediat e zakonshme të kapura bëjnë punën e tyre. Non-stop godasin SPAK-un. Për Veliajn, për Ballukun, për çdo vendim që prek pushtetin. Objektivi është i qartë: të minojë besimin publik te gjyqësia, të krijojë perceptimin se SPAK është armik politik.
Por pretendimet e Ramës nuk mbajnë ujë. Kur thotë se “nuk ndodh në botë” që gjykata të pezullojë një ministër, ai po gënjen.
Në Ukrainë, në nëntor 2025, Ministri i Drejtësisë u pezullua pas akuzave për korrupsion. Ai vetë deklaroi se “pezullimi gjatë hetimit është një skenar i civilizuar”. Dha dorëheqjen. Pa sulmuar gjyqësinë.
Në Tajlandë, në korrik 2025, Gjykata Kushtetuese pezulloi Kryeministren për shkelje etike. Ajo priti vendimin. Pa kërcënuar ndryshime ligjore.
Në Kroaci, në nëntor 2024, Kryeministri shkarkoi Ministrin e Shëndetësisë menjëherë pas arrestimit për korrupsion. “Jam personalisht i tronditur”, deklaroi. Nuk tentoi të mbrojë ministrin.
Edhe në Francë, ish-kryeministrja dhe presidentë kanë përfunduar në gjyq. François Fillon u dënua për korrupsion. Jacques Chirac u dënua me burg me kusht. Nicolas Sarkozy aktualisht vuan dënimin me monitorim elektronik. Askush nuk pretendoi se “kjo nuk ndodh në botë”.
Rama nuk po tregon fakte. Po gënjen. Dhe po e bën me qëllim.
Kushtetuta e Shqipërisë, neni 7, e ka të qartë: “Sistemi i qeverisjes bazohet në ndarjen dhe balancimin e pushteteve legjislative, ekzekutive dhe gjyqësore”. Neni 147 shton: “Gjyqtarët janë të pavarur dhe i nënshtrohen vetëm Kushtetutës dhe ligjeve”. Këto janë themelet e shtetit ligjor.
Por Rama po i shkel këto parime çdo ditë. Kur deklarohet se do të ndërhyjë në Kodin Penal që “pushteti ekzekutiv të mos preket”, ai po thotë hapur se ligji duhet të ndryshojë për ta mbrojtur atë nga drejtësia. Kur kërcënon se do të “adresojë ligjërisht” çështjen e pezullimit të Ballukut, ai po përpiqet të rishkruajë rregullat në mes të lojës.
Presioni ndaj gjyqësorit konsiderohet shkelje kushtetuese në të gjithë botën. BE ka hapur procedura kundër vendeve që sulmojnë gjyqësinë e pavarur.
Shqipëria nuk është përjashtim. Raportet e BE-së 2024 dhe 2025 konfirmojnë presion të vazhdueshëm nga politikanë ndaj gjyqësorit shqiptar. Pavarësia gjyqësore është kriter thelbësor për anëtarësimin në BE. Sulmet e Ramës rrezikojnë të gjithë procesin e integrimit.
Sot është Balluku. Dje ishte Veliaj. Nesër do të jetë dikush tjetër. Çdo herë e njëjta taktikë: sulmo gjyqësinë, mobilizo mediat, kërcëno ndryshime ligjore, krijo perceptimin se drejtësia është armike politike.
Rama thotë se po mbron pushtetin ekzekutiv. Por ajo që po mbron në të vërtetë është imuniteti i vet dhe i rrethit të tij nga drejtësia. Në një shtet ligjor, askush nuk është mbi ligjin. As kryeministri. As zëvendëskryeministrja.
Gjyqësia ekziston pikërisht për këtë: të mbajë llogari edhe ata që ushtrojnë pushtet. Kur ata që janë në pushtet sulmojnë gjyqësinë për të kryer këtë funksion, ata po sulmojnë vetë shtetin ligjor.
