Presidenti i Republikës, Ilir Meta, me anë të një ceremonie solemne të organizuar në qytetin e Sarandës, vlerësoi tre volejbollistë të shquar të “Butrintit” dhe Ekipit Kombëtar me titullin “Mjeshtër i Madh”.
Postimi i Ilir Metës:
“Volejbolli në Sarandë është një sport i dashur dhe shumë popullor, pjesë e trashëgimisë kulturore dhe e krenarisë së këtij qyteti.
Nuk ishte rastësi, që “Butrinti”, për vite me radhë, falë talentit dhe shpirtit të jashtëzakonshëm të garës së lojtarëve të tij, u bë një nga skuadrat më të forta të kampionatit shqiptar të volejbollit për meshkuj, që ka përcaktuar fatet e titujve kampionë dhe përballë të cilit edhe ekipet e mëdha duhet t’i bënin mirë llogaritë.
Në vlerësim të rezultateve të larta të arritura, për kontributin e madh të dhënë për zhvillimin cilësor të volejbollit dhe duke respektuar karrierën e tyre të sukseshme, pata kënaqësinë të nderoj me Titullin “Mjeshtër i Madh,” volejbollistët e spikatur të ‘Butrintit’ dhe Ekipit Kombëtar, Kostaq Stefani dhe Orest Lepuri, ndërsa me Titullin “Naim Frashëri”, Janaq Zhaka.
Volejbolli dhe sporti në Sarandë kanë nevojë për shembuj të tillë pozitivë dhe personalitete frymëzyese për fëmijët dhe të rinjtë për të qenë nesër kampionë dhe të sukesshëm në jetë”, shkroi Meta.
