Shpeshherë BE ka bërë thirrje Parlamentit shqiptar që të kthejë normalitetin në seancat plenare, duke propozuar negociata mes opozitës dhe maxhorancës, të cilat kanë nisur që javën e kaluar mes kryetarëve të grupeve parlamentare.
Së fundmi, lidhur me këtë situatë ka folur edhe ambasadori i BE-së për Shqipërinë, Silvio Gonzato.
Gjatë një deklarate për mediat, Gonzato nga Durrësi bëri thirrje që palët të zhvillojnë dialog të mirë politik dhe kjo çështje të zgjidhet.
Sipas tij procesi i negociatave duhet të jetë gjithëpërfshirës dhe të reflektojë situatën aktuale politike, në mënyrë që të bëhen dhe reformat e nevojshme.
“E kam thënë dhe disa kohë më parë kur u pyeta pikërisht për këtë çështje. Megjithatë unë përdora fjalët që ne kishim thënë më parë dhe këto fjalë janë që ne dëshirojmë që procesi të jetë gjithëpërfshirës dhe konstruktiv. Duhet gjithashtu të reflektojë realitetin politik në vend”, theksoi ambasadori.
Po ashtu ai konfirmon edhe nisjen e bisedimeve për të kthyer parlamentin në normalitet.
“Unë e di që ka disa përpjekje që po bëhen në parlament, pikërisht për të arritur disa reforma në vend. Kryetari i Komisionit Qendror të Zgjedhjeve e ka bërë të qartë që këto janë çështje të cilat ne besojmë do të zgjidhen së shpejti”, u shpreh diplomati evropian.
Prej 5 muajsh tashmë parlamenti është përfshirë nga kaosi për shkak të mosdakordësisë mes mazhorancës dhe opozitës.
Mos lejimi i ngritjes së Komisioneve Hetimore si dhe mos pranimi i kërkesës për të ndryshuar anëtarët e Komisionit të Reformës Zgjedhore bëri që opozita të bllokonte seancat plenare dhe çdo punim të Kuvendit.
