Gazetarja Ola Xama ka denoncuar publikisht pengesat dhe sorollatjet që ka hasur në përpjekje për të marrë një shërbim nga Operatori i Shpërndarjes së Energjisë (OSSH). Sipas saj, prej 18 marsit, pavarësisht se ka paguar faturat dhe ka ndjekur të gjitha procedurat, nuk ka mundur të marrë shërbimin për shkak se drejtori i OSSH është angazhuar në fushatë zgjedhore për Partinë Socialiste.
Xama thekson se është detyruar të bëjë qindra telefonata, të kërkojë ndere, madje edhe të blejë vetë materialet e nevojshme, por përsëri nuk ka arritur të përfundojë procesin pasi mungon firma e drejtorit, i cili ndodhet në fushatë elektorale. Në postimin e saj, gazetarja thekson se kjo situatë pasqyron qartë keqfunksionimin e institucioneve dhe largësinë e Shqipërisë nga standardet e Bashkimit Europian.
Më poshtë postimi i plotë i gazetares Ola Xama:
“E kupton që nuk ke për të hyrë kurrë në Bashkimin Europian, kur për të marrë një shërbim të cilin e paguan të sorollatin, të detyrojnë të futësh miq që të ta zgjidhin dhe në fund të marrësh përgjigjen se ka mbetur vetëm për firmë por drejtori është në fushatë!
Për çfarë bëhet fjalë? Është aplikuar për të bërë lidhje energjie me shtesë fuqie pranë OSSH që në 18 mars dhe askush nuk kthen përgjigje që të japë dakordësi dhe të vazhdohen punimet.
Procedura është e tillë, bëhet aplikimi, specialisti bën preventivin se sa i kushtojnë materialet për lidhjen kompanisë OSSH, paguhet fatura që varion nga 500 në 800 euro, dhe në fund drejtori rajonal firmos për t’i hapur rrugë lidhjes së energjisë. Zakonisht të thonë që duhet të presësh sepse nuk kemi bërë tenderin për furnizimin me materiale, i thua s’ka gjë se i ble vetë, paguan faturën kot (sepse materialet nuk i merr) dhe elektrifikohesh.
Aplikimi për këtë procedurë është online, por ata që e kanë provuar e dinë shumë mirë që duhet të bësh 100 telefonata, të lutesh, stresohesh dhe të kërkosh ndere. Dhe për çfarë? Për të marrë një shërbim që e paguan. Me shërbimet që paguhen siç është shpërndarja e energjisë dhe kërkesat teknike të klientëve, paguhen dhe pagat e punonjësve të cilëve duhet t’iu lutemi dhe t’i gjejmë mikun.
Pasi ke bërë të gjithë këtë rrugë, kur ka fushatë, thonë prit sa të mbarojnë zgjedhjet që drejtori të kthehet në punë. Pra ne i paguajmë rrogën, por ai punon për Partinë Socialiste. Kjo është keqeverisja dhe këtu e kupton që Bashkimi Europian është qindra vite dritë larg.”
