Presidenti i Institutit Liberal Pashko, Preç Zogaj, komentoi lirimin nga arresti shtëpiak të liderit të Partisë Demokratike, Sali Berisha, duke e vlerësuar si një vendim të drejtë dhe të bazuar në ligj.
Ai theksoi se ky veprim ishte një akt sovran i gjykatës, e cila respektoi ligjin dhe mundësitë e përcaktuara nga Gjykata Kushtetuese për të lejuar lirimin.
Zogaj shtoi se një situatë ku kryetari i opozitës ishte nën arrest, ndërsa kryeministri ishte i lirë për të zhvilluar aktivitete, do të kishte qenë e padrejtë për garën zgjedhore.
Ai vlerësoi gjithashtu ndikimin pozitiv të rikthimit të Berishës për PD-në dhe opozitën, duke theksuar se ai ka vazhduar të komunikojë me mbështetësit dhe të mbajë konferenca shtypi edhe gjatë periudhës së arrestit.
Zogaj theksoi se tani fokusi i Berishës dhe Partisë Demokratike duhet të jetë krijimi i një plani për rotacionin politik dhe bashkimin e fraksioneve opozitare për zgjedhjet e ardhshme.
Megjithatë, ai paralajmëroi se Berisha do të përballet me dy sfida të mëdha në të ardhmen: akuzat penale që SPAK ka ngritur ndaj tij dhe sanksionet e mundshme nga SHBA.
“Lirimi i Sali Berishës nga arresti është vendimi sovran i një gjykatëseje që ka lexuar ligjin dhe ndoshta vendimin e Gjykatës Kushtetuese që e lë hapur këtë mundësi. Do kishte qenë anomali që kryetari i partisë më të madhe opozitare nën arrest dhe kryeministri në terren, nuk do ishte e drejtë si lojë. Nuk duket se ka pasur një bazë të fortë ligjore që të mos shuhej arresti shtëpiak i Berishës.
Rikthimi i Berishës ndikon pozitivisht për partinë e tij dhe opozitën. Megjithatë arresti shtëpiak nuk është njësoj si burgu pasi Berishës nuk i ka munguar kontakti me suportuesit, ka mbajtur konferenca shtypi, etj. Mesazhi i tij nuk ka munguar. Tani që në horizont janë zgjedhjet, detyra e tij dhe e njerëzve të tij është ndërtimi i planit të rotacionit. Ky duhet të jetë qëllimi përbashkues i të gjithë fraksioneve opozitare.
Berisha nuk ka humbur aq shumë kohë, ka pasur një periudhë aktive nga opozita. Dy sfidat e mëdha të Berishës mbeten. E para është akuza penale që SPAK ka dorëzuar në gjykatë ndaj tij dhe e dyta është sanksionimi nga SHBA. Këto janë dy sfidat me të cilat Berisha do të përballet në muajt në vijim”, u shpreh ai.
