Deputetja e Partia Demokratike, Ina Zhupa, ka reaguar pas protestës së sotme të opozitës, duke dënuar dhunën policore ndaj protestuesve dhe përdorimin e gazit lotsjellës të skaduar, të cilin e ka cilësuar si të papranueshëm dhe në kundërshtim me ligjin.
Në reagimin e saj publik, Zhupa thekson se përdorimi i gazit lotsjellës të skaduar përbën rrezik serioz për shëndetin publik dhe shkelje të hapur të parimeve ligjore që rregullojnë ndërhyrjen e forcave të rendit gjatë tubimeve.
“Dhuna policore ndaj protestuesve dhe përdorimi i gazit lotsjellës të skaduar është e papranueshme, shkelje e hapur e ligjit dhe rrezik serioz për shëndetin publik. Gaz lotsjellës i skaduar që u hodh sot në protestë të shkaktojë probleme të rënda me frymëmarrjen, djegie kimike, dëmtime të syve dhe pasoja afatgjata shëndetësore, sidomos për fëmijët, të moshuarit dhe personat me sëmundje kronike. Këto nuk janë ‘efekte anësore’, por pasoja të rënda të një veprimi të ndaluar nga ligji”, shprehet ajo.
Deputetja nënvizon se ligji kërkon proporcionalitet, siguri dhe respekt për jetën dhe dinjitetin e qytetarëve, duke theksuar se asnjë urdhër nuk mund të justifikojë rrezikimin e shëndetit të njerëzve.
“Asnjë uniformë e narkopolicisë, narkogardës nuk e justifikon abuzimin me detyrën, asnjë urdhër i narkoqeverisë nuk e justifikon rrezikimin e shëndetit të njerëzve. Protesta është e drejtë qytetare”, deklaron Zhupa.
Ajo përfundon duke theksuar se dhuna policore dhe përdorimi i kimikateve të skaduara përbëjnë abuzim me pushtetin dhe rrezik të drejtpërdrejtë për jetën dhe shëndetin e qytetarëve.
