Policia e Kosovës ka realizuar një operacion në qytetet e Prishtinës dhe Gjilanit, mësohet se nga operacioni kanë rënë në pranga 6 persona, të cilët dyshohet se kanë konfiskuar mbi 82 kilogramë substanca narkotike, marijuanë. Gjatë kontrollit janë sekuestruar në cilësinë e provave materiale automjete të ndryshme gjithashtu edhe : 82 kilogramë e 914 gramë mrijuan; 100 paketime të barnave të kontrabanduara, me peshë prej 100 kilogramëve e 180 gramëve; 1 pushkë gjuetie me 35 predha (fishekë) si dhe dy qese najloni të mbushura me barot dhe sfera për municion të armës së gjuetisë.
Po ashtu janë sekuestruar: 1 armë e gjatë ‘AK- 47’ me një karikator, 1 revole ‘TT’ me një karikator dhe 6 predha (fishekë), 1 dylbi e armës së gjatë, 174 predha (fishekë), 5 vetura të ndryshme, 15.774,50 €, 20 franga zvicerane dhe barna të llojeve të ndryshme.
Në prangat e policisë kanë rënë personat e dyshuar dhe me vendim të institucioneve kompetente janë dërguar në paraburgim për 48 orë. Arrestimi i tyre është bërë për përfshirjen në veprat penale “Blerja ,posedimi shitja dhe shpërndarja e paautorizuar e narkotikëve, substancave psikotrope ose analoge”, “Mbajtja nën kontroll dhe shfrytëzim i paautorizuar i armëve”, “Prodhimi dhe shpërndarja e produkteve të dëmshme mjekësore dhe pa banderolë” si dhe “Shmangia nga pagesat e detyrueshme doganore ose tarifave akcizore”.
Gjithashtu me urdhër të prokurorit kompetent është bërë edhe kontrolli i katër vendeve të tjera, ku kanë qenë të përfshira edhe dy banesa, njëra në Prishtinë dhe tjetra në Fushë Kosovë, si dhe dy shtëpi në Gjilan së bashku me një objekt përcjellës, të cilat dyshohet se grupi në fjalë i kanë përdorur për fshehje, shitje dhe shpërndarje të narkotikëve, si dhe për kontrabandë të barnave me origjinë të dyshimtë.
