Policia e Kosovës ka sekuestruar granata dore, municion dhe pajisje të tjera ushtarake në fshatin Banjskë, në veri të vendit, të banuar kryesisht nga serbë.
Sipas njoftimit të autoriteteve, mjetet u zbuluan të premten mbrëma nga pjesëtarët amerikanë të KFOR-it, në një mulli të braktisur.
Pas raportimit të KFOR-it, njësitë policore ndërhynë dhe konfiskuan tre granata dore, dy shokë bomba, një bombë ndriçuese, 28 fishekë për armë të gjatë, tre karikatorë të zbrazët, uniforma ushtarake dhe gjoksore për mbajtje të armatimit.
Kjo është hera e dytë brenda një jave që Policia e Kosovës sekuestron armë dhe pajisje ushtarake në veri.
Më 28 shkurt, gjatë një operacioni në fshatin Rodel të Leposaviqit, autoritetet zbuluan armë, municion dhe uniforma, që sipas tyre i përkisnin organizatës Mbrojtja Civile – e shpallur terroriste në Kosovë.
Situata në veriun e Kosovës mbetet e tensionuar që nga 24 shtatori 2023, kur një grup serbësh të armatosur sulmuan Policinë e Kosovës në Banjskë, duke vrarë një rreshter.
Përgjegjësinë për këtë sulm e mori Millan Radoiçiq, ish-nënkryetar i Listës Serbe, i cili akuzohet nga autoritetet kosovare, ndërsa Serbia refuzon ta ekstradojë.
