Policia e Shtetit ka publikuar ditën e sotme disa pamje nga ambienti jashtë Kuvendit të Shqipërisë. Aty nuk i kanë shpëtuar gjobitjes 3 deputetë, që nuk kishin vënë maskën edhe në ambiente të jashtme.
Në fillim u kap ‘mat’ deputeti Florenc Spaho. Edhe pse u mundua që ta vinte maskën pasi u vu re nga Policia, ai nuk i shpëtoi gjobës. “Viktimë” kanë rënë edhe deputetët e opozitës, Alban Zeneli dhe Kujtim Gjuzi, të cilët i janë bindur urdhrit dhe kanë pranuar gjobën.
‘Harrojnë’ Sandër Lleshajn
Por, ai që sfidoi hapur vendimin e kryeministrit Rama, ishte ministri i Brendshëm, Sandër Lleshaj. Ai foli disa herë në foltore, dhe në asnjë moment nuk e kishte vënë maskën. Gjithashtu, edhe i ulur në karrigen e tij, Lleshaj nuk e kishte të vënë maskën, pavarësisht se gjendej në ambient të mbyllur.
Sidoqoftë, efektivët e Policisë që gjendeshin jashtë Kuvendit, e harruan shefin dhe eprorin e tyre, dhe ai nuk mori gjobë, dhe nuk u bë as shembull për qytetarët e thjeshtë, që nuk e kanë mbajtur maskën.
Lleshaj sot ne Parlamet, 15 tetor 2020
/GazetaReforma.com/
