Kriza që mund të shkaktojë COVID-19 në ekonomi ka bërë që qeveria të zbeh masat dhe të kthejë në punë një pjesë të mirë të biznesve, mbyllja e të cilave, sipas kryeministrit, do na fuste në një gropë më të madhe se koronavirusi.
Mbrëmjen e sotme, ministri Ahmetaj i ftuar në “Real Story” , u pyet nga Sokol Balla se si kishte mundësi që gjykatësit e mbyllur në shtëpi do paguhen kurse avokatët jo.
Ahmetaj sqaroi se këta të fundit janë të lirë të ushtrojnë profesionin e tyre, ndërsa renditi edhe një sërë biznesesh të tjera që mund të ushtrojnë aktivitetin përtej 8 orarshit të vendosur nga qeveria.
“Jam shumë i kujdesshëm me fjalët që zgjedh, ky është një moment i vështirë dhe qeveria në ngarkesë, emocion, njerzillëk e monitoron situatën përditë…jam i bindur që ne do ta rimarrim shpejtësinë ekonomike që humbëm nga COVID-19. Sot është momenti të shpëtojmë jetë njerëzish dhe të sigurojmë mbështetje për njerëzit në nevojë, ti më kujton avokatin. Unë kam respekt për të, por avokati ka mundësi të punojë se sipërmarrja ka filluar punën”,- tha ministri.
Teksa me tej shtoi se: “Bujqësia është e lirë të punojë nga mëngjesi në darkë, kemi ndërtimin, le të rrinë të hapur me tre turne nëse mund të punojë, fasonët, call center janë të hapur..mund të punojnë dhe me tre turne po të duan, kompanitë e shërbimit po ashtu me makina të loguara të kompanive dhe leje përkatëse”.
