Një ngjarje e rëndë kriminale është parandaluar nga forcat e policisë në Elbasan. Siç bëhet me dije nga blutë e Elbasanit një person është pikasur në rrugë duke ecur me armë zjarri tip kallashnikov, me plumba në fole, gati për qitje. Policia menjëherë i është vënë pas për ta kapur, por pa sukses. Personi ka mundur që të shpëtojë nga ndjekja, por ka lënë pas armën.
Burime nga policia e Elbasanit bëjnë me dije se është identifikuar personi që ka hedhur armën, ai është shtetasi me inicialet B.R 23 vjeç.
Ai ndodhej në afërsi të zonës së quajtur ish Sporti i Vjetër kur policia është vendosur në ndjekje të tij, pa mundur që ta vërë në pranga.
Gjithashtu blutë kanë arrestuar edhe një person tjetër i cili dyshohet se ka dijeni për ngjarjen, emri i të cilit për arsye hetimore ende nuk bëhet i ditur. Gjithashtu nuk dihet ende se për çfarë do të përdorej arma e zjarrit. Gjithsesi në bashkëpunim me prokurorinë e Elbasanit vijojnë hetimet për ta zbardhur të plotë këtë ngjarje.
Kujtojmë muajt e fundit kanë pasur një bilanc jo të mirë për sa iu përket viktimave, ku më së shumti i përkasin konflikteve në familje dhe hakmarrja.
