Ditën e djeshme banorë të Dibrës, aktivistë të çështjeve mjedisore dhe qytetarë të thjeshtë marshuan drejt Kryeministrisë për t’i kërkuar qeverisë edhe një herë ndalimin e punimeve për hidorcentralin mbi lumin Drin i Zi.
Skavica sipas protestuesve do të mbulojë me ujë dhjetëra fshatra duke shuar historinë e një zone të tërë.
Banorët e Dibrët nuk shohin asnjë dritë në fund të digës, por ndjehen, sikurse në burimet e tjera natyrore të saj, të shfrytëzuar dhe të humbur.
Madje, shumë banorë përmendin rrezikun se përmbytjet në tokat e tyre do të jenë të vazhdueshme.
Ata u shprehën se ende për Skavicën nuk ka transparencë të plotë se si do të ndërtohet dhe çfarë do ndodhë me banorët që preken nga ky projekt.
Por, si vijon historia e Skavicës që po kundërshtohet prej kohësh?
Bëhet fjalë për një hidrocentral me kapacitet instalimi 210 megavatë, që planifikohet të ndërtohet në Skavicë të Kukësit, në lumin Drini i Zi, zona kufitare me Skavicën, që rrezikon 30 fshatra në Dibër.
Korporata Elektroenergjitike Shqiptare (KESH) nënshkroi në korrik të vitit 2021 kontratën me kompaninë amerikane “Bechtel” për të filluar punimet për ndërtimin e hidrocentralit mbi lumin Drin.
Kostoja e projektit nuk është ende e përcaktuar qartë, por qeveria shqiptare ka përmendur shumën prej 500 milionë eurosh.
Skavica u mbështet fillimisht nga Fondi i Investimeve të Ballkanit Perëndimor në Bashkimin Europian. Por në janarin e vitit 2021 BE u tërhoq.
Më pas projekti Skavica u përfshi në Planin Ekonomik të Investimeve për Ballkanin Perëndimor me kërkesën e Shqipërisë, dhe më pas u tërhoq, pas marrëveshjes midis Shqipërisë dhe SHBA”.
Sipas KESH-it dhe kompanisë amerikane, ky hidrocentral do ta kthejë Shqipërinë në një lider absolut në sektorin rajonal të energjisë elektrike, por edhe në një eksportues të energjisë elektrike.
