Një ngjarje e pazakontë ka ndodhur këtë të martë pranë “Shkollës së Bashkuar” në Tiranë. Gazetari Ergys Gjençaj është ndodhur rastësisht në Shkollën e Bashkuar ku policia po realizonte një aksion antidrogë. Gazetari i News 24 ishte duke filmuar në momentin që një makinë tip “Benz” është larguar me shpejtësi dhe nuk i është bindur urdhrit të policisë për të ndaluar.
Në momentin që kanë parë gazetarët duke filmuar policia ka ndërhyrë menjëherë duke e shtrirë në tokë dhe duke mos e lejuar që të filmonte aksionin që po zhvillonin. Në një prononcim për “News 24” gazetari është shprehur se e vetmja gjë që po bënte ishte detyra e tij.
“Ne po drejtoheshim drejt redaksisë për të vijuar punën tonë, kur policia na ndali. Misioni ynë është për të përcjellë lajmin, qoftë me mjetet tona celularë, për të kapur momentin aty ku ndodhet lajmi, dhe këtë bëra edhe unë. Ishte një operacion i policisë, makina ishte në lëvizje, unë nxora celularin tim për të bërë video, sepse jemi në rrugë, është ambient publik, nuk po cënoja privatësinë e askujt.
Unë dola nga makina për të vijuar regjistrimin me celularë, kur disa policë më morën, më shtrinë barkas aty për të më kontrolluar, më morën celularin dhe më lanë aty të shkallët. I thashë që jam gazetar. Më pyetën ku punoj, prej sa kohësh. Më morën celularin dhe më lanë të prisja aty deri tani.
Më dhanë shpjegime, sepse sipas tyre, unë ndërhyra në aksionin e policisë. Unë nuk e di ku është ndërhyrja ime, kur isha në makinën e loguar të News24. Isha në largësi kur po kryhej operacioni, nuk isha afër që të kisha kontakte me forcat e policisë. Unë bëra punën time dhe besoj se çdo koleg do ta bënte. Ky është një moment delikat, nuk më kishte ndodhur ndonjëherë. Unë do ta vlerësoj këtë moment, misioni ynë është të kapim lajmin. Kjo gjë nuk ndodh çdo ditë në rrugët e vendit, sigurisht që policia ka detyrimin të godasë krimin, por edhe ne kemi detyrën tonë”, tha gazetari .
