Kreu i Grupit Parlamentar të PD, Gazment Bardhi, është përfshirë në një debat të ashpër me deputetin Agron Shehaj, pas një incidenti në Kuvend. Shehaj ka bllokuar foltoren për gati dy orë, duke mos lejuar as deputetët e maxhorancës, as ata të opozitës, të mbajnë fjalën.
Edhe pas tentativave të kolegëve për ta bindur të lirojë foltoren, Shehaj ka refuzuar dhe ka vazhduar të qëndrojë në vendin e tij, përfshirë edhe pas përjashtimit nga seanca.
Në një moment të tensionuar, Gazment Bardhi i është drejtuar Shehajt duke i thënë: “Po bëhesh shërbëtor i këtyre,” duke aluduar për lidhjet e Shehajt me socialistët.
Agron Shehaj ka reaguar duke i kujtuar Bardhit ngjarjet e 8 janarit 2022, kur ai kishte qenë në selinë e PD-së, gjatë protestës së demokratëve për të hyrë në godinë, ku disa prej tyre u sulmuan. “Ti i ke rrahur demokratët, ti i ke rrahur,” i është përgjigjur Shehaj Bardhit, duke nxjerrë në pah një ngjarje të kaluar që ka krijuar tensione brenda Partisë Demokratike.
