Edhe një ditë tjetër banorët e Laknasit janë përballur me kërcënimin e makinerive të kompanisë “Bio Products” sh.a që vazhdon tentativën për të rrethuar pyllin “Plepat e Brukës për të filluar ndërtimin e thertores. Çështja është ende nën shqyrtim nga Gjykata dhe madje ka përfunduar edhe leja për ndërtim e Vlerësimi për Ndërhyrjen në Mjedis ka përfunduar. Pavarësisht këtyre, kompania private nuk e sheh si problem që herë pas here të mësyjë në Laknas. Kanë qenë banorët ata që si në çdo rast, i kanë ndaluar punëtorët të hyjnë në pyll duke e ruajtur territorin gjatë ditës dhe kanë ndaluar makineritë të veprojnë.
Por “Bio-Products” sh.a. vazhdon edhe më tej, pasi ka denoncuar kryeplakun Dashamir Gjokmeli si organizator të mosbindjes së banorëve. Gjokmeli është paraqitur në komisariatin numër 5. Ndërkohë, nga ana tjetër është bërë kallëzim për firmën për ndërhyrjen në zonë dhe prerje të paligjshmë të pemëve.
Prej disa muajsh banorët e e Laknasit janë në një betejë ligjore me firmën “Bio-Products”. Çështja është ende në shqyrtim nga Gjykata Administrative e Apelit dhe në seancën e kaluar (20 shtator 2021) nuk u mor një vendim në mungesë të aktit të ekspertimit. Ekspertët në mënyrë të përsëritur, nuk bënë numërimin fizik të pemëve dhe nuk përcaktuan cila ishte pjesa me dendësinë më të madhe të pronës. Seanca e radhës pritet të mbahet në 20 tetor, gjithashtu me pritshmërinë që palët të kenë aktin në dorë. Ndërkohë, banorët kanë qenë të gatshëm për të qenë në terren, për të ndërhyrë ndaj çdo lloj përpjekje të firmës private për të rrethuar zonë dhe për të filluar punën.
