Mbledhja e Komisionit Hetimor për sistemin TIMS ka vijuar me debate të ashpra mes përfaqësuesve të mazhorancës dhe opozitës. Kryetari i komisionit, deputeti i PD Ervin Salianji, akuzoi socialistët se po përpiqen të mbyllin punën hetimore të komisionit pa zbardhur procesverbalet dhe pa shqyrtuar të gjitha dëshmitë e nevojshme.
Toni Gogu: “Hidhe në votim, kryetar.”
Kjo kërkesë nga deputeti socialist Toni Gogu nxiti reagimin e menjëhershëm të Salianjit, i cili e cilësoi kërkesën si të pabazuar dhe kërkoi zbardhjen e procesverbalit për të garantuar transparencën e procesit.
Ervin Salianji: “Ça të hedhim në votim, budallallëqet tuaja? Nuk është zbardhur procesverbali.”
Salianji theksoi se anëtarët e komisionit nuk janë njohur ende me procesverbalet dhe se votimi pa këto dokumente do të ishte shkelje e detyrës. Nga ana tjetër, Gogu pretendoi se zbardhja e procesverbalit është kompetencë e administratës dhe se komisioni duhet të përmbyllë hetimin dhe të votojë përfundimin e tij.
Toni Gogu: “Ndajmë të njëjtin shqetësim për zbardhjen e procesverbalit të datës 26. është kompetencë e administratës.”
Gogu vazhdoi duke argumentuar se hetimi ka përfunduar dhe se komisioni duhet të deklarojë përfundimin e tij. Sipas tij, opozita po përdor procesverbalet si një mënyrë për të zvarritur punën e komisionit.
Ervin Salianji: “Po qëndruat shumë kohë në tualet, ngatërroni vendin dhe shfryni këtu.”
Debati u përshkallëzua më tej me akuza personale dhe sulme verbale nga të dyja palët. Lefter Gështenja, një tjetër anëtar i opozitës, akuzoi mazhorancën se po përpiqet të mbyllë hetimin pa u shqyrtuar të gjitha dëshmitë dhe pa u thirrur të gjithë dëshmitarët e nevojshëm.
Lefter Gështenja: “Kështu si po vepron PS, i bie që jemi ne fajtorët. Sikur e kemi ne përgjegjësinë për atë që ndodhur me TIMS.”
Xhemal Qefalia nga mazhoranca argumentoi se komisioni duhet të mbyllë hetimin dhe të raportojë në Kuvend, duke mbështetur kërkesën e Gogut për votim të përfundimit të hetimit.
Xhemal Qefalia: “Ju nuk jeni të qartë për ta bërë raportin sot. Nëse e keni të qartë që ka patur ndërhyrje në TIMS, të deklarojmë të mbyllur hetimet.”
Në përfundim, Salianji akuzoi mazhorancën se po përpiqet të digjni afatet e punimeve dhe të mbyllë hetimin pa prodhuar një raport që mund të dërgohet në SPAK. Ai kërkoi që komisioni të vazhdojë hetimin dhe të thërrasë dëshmitarët e nevojshëm për të zbardhur të gjitha akuzat dhe dyshimet që kanë dalë gjatë procesit hetimor.
