Gjykata e Posaçme ka dënuar Ilirian Feçin, Elvis Koçin dhe Agim Gjinin për vjedhje me dhunë dhe sigurim kushtejsh për kryerjen e vrasjeve, përfshirë atë të Sokol Sanxhaktarit, dhëndrit të ish-kryebashkiakut të Elbasanit, Qazim Sejdini.
Vendimi u dha nga gjyqtari Ardit Mustafaj, i cili miratoi kërkesën e Prokurorisë së Posaçme, duke dënuar:
• Elvis Koçi me 7 vite burg për “Sigurim i kushteve dhe i mjeteve materiale për të kryer vrasje” në dëm të Sokol Sanxhaktarit, në periudhën 25-30.07.2020, dhe për “Kryerjen e veprave penale nga grupi i strukturuar kriminal”.
• Ilirian Feçi me 10 vite burg për “Vjedhje me dhunë” në dëm të Skënder Roshit, më 28.04.2011, dhe për “Kryerjen e veprave penale nga grupi i strukturuar kriminal”.
• Agim Gjini me 10 vite burg për “Vjedhje me dhunë” në dëm të Astrit Ademit, më 31.05.2013, dhe për “Kryerjen e veprave penale nga grupi i strukturuar kriminal”.
Treshja u gjykua me procedurë të shkurtuar dhe do të përfitojë zbritjen e dënimit me 1/3. Për pjesën tjetër të grupit, që akuzohet për vepra më të rënda penale, vijon gjykimi i zakonshëm. Pjesë e këtij grupi janë Nuredin Dumani, Henrik Hoxha, Skerdi Tase, Enver Diva, Besjan Xhixha, etj.
Operacioni “Plumbi i Artë”, i zhvilluar në mars të 2022, çoi në kapjen e disa anëtarëve të grupit, të cilët fituan statusin e bashkëpunëtorëve të drejtësisë dhe zbardhën krime të rënda përmes dëshmive të tyre.
