Është zbardhur ngjarja e ndodhur mbrëmjen e 30 majit në Durrës, ku një 36-vjeçar mbeti i plagosur me armë zjarri në zonën e njohur si “Fllakë e Egër”, përgjatë aksit rrugor “Katër Rrugët e Fllakës–Katund Sukth”. Policia ka identifikuar si autor të dyshuar të sulmit me armë shtetasin Erkid Kazazi, 30 vjeç, banues në Kavajë, i cili aktualisht është shpallur në kërkim.
Sipas informacioneve të para nga hetimi, i plagosuri, Arbër Goreja, po udhëtonte me automjetin e tij tip “Lancia” dhe shoqërohej nga dy të mitur të moshës 14 dhe 15 vjeç, të cilët nuk kanë pësuar lëndime. Rreth orës 19:30, gjatë një parakalimi nga një mjet tjetër tip “Ford Focus”, Kazazi dyshohet se ka qëlluar me armë zjarri, duke plagosur Gorejën.
Hetimet paraprake tregojnë se disa ditë para ngjarjes, Arbër Goreja kishte ushtruar dhunë fizike ndaj babait të Erkid Kazazit, i cili kishte mbetur i dëmtuar, por pa rrezik për jetën. Ky konflikt paraprak dyshohet të jetë shkaku i atentatit të mbrëmjes së kaluar.
Policia e Durrësit, në bashkëpunim me Prokurorinë, po vijon punën hetimore për zbardhjen e plotë të ngjarjes dhe kapjen e autorit të dyshuar. Materialet i janë kaluar Prokurorisë së Durrësit për veprime të mëtejshme procedurale.
