Prokuroria e Tiranës ka sekuestruar disa pasuri të Paris Prengës dhe të familjarëve të tij, në kuadër të hetimeve pasurore për personat e dënuar për krime të rënda.
Prenga, i njohur si pjesë e grupit kriminal të drejtuar nga Gjergj Cukali, është dënuar për disa vepra penale të rënda, përfshirë tentativën për vrasje dhe përfshirjen në organizata kriminale.
Nga verifikimet rezulton se ai nuk ka burime të ligjshme të të ardhurave për të justifikuar pasuritë e përfituara. Dyshohet se këto janë përftuar përmes aktivitetit kriminal.
Pasuritë e sekuestruara përfshijnë një apartament banimi, një garazh, një njësi tregtare dhe një servis automjetesh.
Paris Prenga është dënuar me 18 vite burg për atentatin e mbetur në tentativë ndaj Artion Bylykut, kunat i Domart Konjarit.
Ai është shpallur fajtor për një sërë veprash penale, si:
– “Vrasja me dashje” e mbetur në tentativë dhe kryer në bashkëpunim;
– “Shkatërrimi i pronës me eksploziv”;
– “Mbajtja pa leje e armëve dhe municioneve”;
– dhe “Pjesëmarrja në grup të strukturuar kriminal”.
Njoftimi Prokurorisë:
Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm Tiranë u sekuestruan pasuritë e shtetasit P.P., i dënuar për veprën penale ‘Vrasja me paramendim’ e mbetur në tentativë, ‘Mbajtja pa leje dhe prodhimi i armëve, armëve shpërthyese dhe i municionit’ dhe ‘Grup i strukturuar kriminal’, parashikuar nga nenet 78/2-22, 152, 278, 28/4 dhe 333/a të Kodit Penal.
Nga hetimet e Prokurorisë pranë Gjykatës së Shkallës së Parë të Juridiksionit të Përgjithshëm, Tiranë, të zhvilluara mbi bazën materialit të referuar nga Drejtoria e Përgjithshme e Policisë së Shtetit, rezultoi se shtetasi P.P., ka një nivel të pajustifikuar ekonomik dhe dyshohet se pasuritë e tij të paluajtshme i ka fituar si rezultat i veprimtarisë së tij kriminale ku ka marrë edhe dënimin përkatës.
Prokuroria pranë Gjykatës së Shkallës së Parë të Juridiksionit të Përgjithshëm, Tiranë në kuadër të hetimit pasuror nr.05/P, dt 02.07.2025 kërkoi sekuestrimin e pasurive të tij dhe familjarëve, për shkak se ato nuk justifikohen me burimet ligjore, si më poshtë:
Pasuria me nr.3/708+4-8, vol.23, fq/120, Z.K 8130, e llojit “Apartament” me sip.97.7 m2;
Pasuria me nr.3/708-G2, vol.23, fq/3, Z.K 8130, e llojit “Garazh” me sip.18.95 m2;
Pasuria me nr.1/312-N20, vol.24, fq/232, Z.K 8370, e llojit “Njësi” me sip.256.1 m2; si dhe
Aktivitetin e subjektit “Auto Art Service”.
