Piktori i njohur Mustafa Arapi nuk e fitoi dot betejën me koronavirusin. Ai ndërroi jetë në moshën 70- vjeçare, pasi ishte i shtruar prej ditësh në Spitalin “Shefqet Ndroqi”.
Lajmin e vdekjes së tij e bëri të ditur vajza e tij Dorina Arapi, e cila njoftoi se babai i saj ka ndërruar jetë në mesnatë duke lënë një mesazh prekës për babain e saj.
Dorina na zbuloi disa ditë më parë se babai i saj ishte shtruar tek spitali COVID-2 dhe i kishte bërë thirrje kryeministrit Rama dhe ministres Manastirliu që babait të saj t’i kushtohej vëmendje maksimale nga stafi mjekësor pasi ai ishte një personalitet i lartë në kulturën shqiptare.
Mustafa Arapi ka lindur më 23 korrik 1950 në Tiranë. Ai u diplomua në Akademinë e Arteve në vitin 1979 për pikturë. Pas studimeve ai filloi të punonte si restaurues i veprave të artit bizantin në Institutin e Monumenteve të Kulturës në Tiranë. Ka punuar si profesor në Akademinë e Arteve nga viti 1985 deri më 1991. Pastaj, gjatë viteve 1993-2006 ishte shef i Departamentit të Punëve të Artit në Institutin e Monumenteve të Kulturës.
Përkrah një fotografie të babait të saj të ndjerë Dorina ka shkruar:
“Sot në mesnatë, babi im u largua nga jeta Drita, dielli, bota, shtylla e familjes sonë u shua. Ba! Dua të të kujtoj kështu të qeshur gjithmonë!
Të duam përjetësisht!”
/Gazetareforma.com/
