Volejbollistja braziliane e Dinamos, Nayara Ferreira, është pezulluar nga Federata Shqiptare e Volejbollit pas ankesave të klubeve të Vllaznisë dhe Pogradecit për gjininë e saj. Rasti, i pazakontë për sportin shqiptar, ka hapur një debat të gjerë publik, ndërsa federata vendosi të kërkojë një “test gjinie” për sportisten.
Klubi i Pogradecit, një nga ankuesit, më pas sqaroi se në dyshim nuk ishte gjinia e 32-vjeçares, por “dyshohej për terapi hormonale ose përdorim të substancave të ndaluara”.
Megjithatë, për Deutsche Welle, Ferreira shprehu indinjatën e saj duke e cilësuar vendimin e federatës “pa bazë ligjore” dhe “thellësisht diskriminues”.
“Federata më kërkoi një test gjinie pa bazë ligjore. Pse po ma bëni këtë? Për shkak të fytyrës, flokëve apo tatuazheve? Ata nuk kishin asnjë bazë ligjore për të më pezulluar për tre ndeshje. Ndjej diskriminim dhe mungesë respekti. Ndihem e shkatërruar, po çmendem. Unë e bëra testin vullnetarisht sepse dua të ndihmoj klubin. Por nuk kam pse t’i vërtetoj askujt që jam grua, sepse unë jam grua”, deklaroi ajo.
Edhe bashkëlojtaret e saj kanë dalë në mbështetje të plotë të sportistes. Kapitenia e Dinamos, Elena Bego, e cilësoi rastin “skandaloz” dhe pa precedent në karrierën e saj.
“Ishim të shokuara. Mund të them se është hera e parë në karrierën time që përballem me diçka të tillë. E kemi mbështetur Nayarën gjatë gjithë kohës, sepse ne e dimë që ajo është vajzë”, tha Bego.
Ferreira vijon stërvitjet me ekipin e Dinamos, ndërsa klubi i ka shprehur mbështetje të plotë në këtë situatë që ka tronditur opinionin sportiv në vend.
