Në Prizren u mbajt sot edicioni i pestë i Turneut Ndërkombëtar në Mundje “Dita e Kolosëve”, një aktivitet sportiv që tashmë ka zënë vend të përhershëm në kalendarin rajonal të këtij sporti.
Ngjarja u zhvillua në Qendrën Sportive “Sezai Surroi” dhe u organizua nga Klubi “Kolosi Infinit”, duke sjellë në tapetin prizrenas dhjetëra sportistë të rinj nga Kosova, Maqedonia e Veriut dhe Shqipëria.
Turneu kishte në fokus grupmoshat pionierë dhe kadetë, ndërsa rivaliteti i ndershëm dhe emocionet sportive dominuan gjatë gjithë zhvillimit të ndeshjeve.
Një moment i veçantë i edicionit të sivjetëm ishte nderimi i vëllait dhe motrës, Ernest dhe Erglena Domi nga Kukësi, të cilët u dekoruan me brezin e turneut për kontributin dhe arritjet e tyre të veçanta.
Dy sportistët, që prej vitesh janë pjesë e klubit organizator, u shpallën gjithashtu “Kolosët e Vitit 2025”, duke u kthyer në një simbol të përkushtimit dhe pasionit për sportin e mundjes.
Shqipëria u përfaqësua nga Klubi i Mundjes Kukës, që mori pjesë me shtatë sportistë, të cilët shënuan një paraqitje të suksesshme.
Trajneri i ekipit, Ali Cenaj, vlerësoi pjesëmarrjen si shumë të dobishme për zhvillimin e grupmoshave, duke theksuar se kjo është hera e tretë që klubi merr pjesë në këtë turne.
Nga shtatë garuesit kuksianë, pesë dolën me medalje:
Jasin Gërbolli (32 kg) – vendi i dytë, medalje argjendi
Erik Cenaj (32 kg) – vendi i tretë, medalje bronzi
Aron Shahu (38 kg) – vendi i tretë, medalje bronzi
Boris Matmuja (42 kg) – vendi i tretë, medalje bronzi
Algen Axhami (44 kg) – vendi i dytë, medalje argjendi
Për klubin kuksian, ky ishte një tjetër sukses i rëndësishëm që pasqyron seriozitetin në përgatitje dhe angazhimin për të përfaqësuar denjësisht Shqipërinë në arenat ndërkombëtare.
“Dita e Kolosëve” vazhdon të jetë më shumë se një turne sportiv, një platformë që nxit rritjen e talenteve të rinj, forcon lidhjet mes klubeve dhe kultivon shpirtin e garës së pastër në sportin e mundjes.
