Kryeministri Edi Rama ndodhet ditën e sotme në Berlin, ku po kërkon një përgjigje pozitive nga Gjermania për hapjen e negociatave.
Kreu i ekzekutivit shqiptar është takuar edhe me kancelaren gjermane, Angela Merkel.
Rama ka mbetur tepër i kënaqur dhe optimist nga takimi, duke e cilësuar kancelaren një mike të vërtetë.
“‘Në Kancelarinë Federale për të kërkuar PO-në për Shqipërinë. Shumë i inkurajuar nga vlerësimet dhe predispozita pozitive ndaj Shqipërisë e kancelares Merkel. Mike e vërtetë”, ka shkruar Rama në një postim në rrjetet sociale.
Gjithashtu shefi i qeverisë i ka dhuruar Merkelit një libër me pikturat e tij, moment të cilit e ka postuar edhe faqja e kancelares në Instagram.
Shtatori është një muaj shumë i rëndësishëm për Shqipërinë, pasi Bundestagu do të diskutojë nëse do t’i japë apo jo dritën jeshile vendit tonë për nisjen e negociatave.
Vendimi përfundimtar do të jepet në tetor, pasi të jetë votuar edhe në parlamentin gjerman.
