Një tjetër ngarkesë me fileto pule me salmonelë është bllokuar në Durrës, e importuar nga Brazili. Ky produkt ka rezultuar pozitiv për prani të bakterit Salmonella Typhimurium.
Pas analizimit të mostrës së mishit të pulës (fileto e ngrirë), janë marrë masa administrative dhe ligjore ndaj subjektit përgjegjës, ndërsa është referuar në Prokurorinë e Rrethit Gjyqësor Tiranë për veprime të mëtejshme.
Megjithatë, ky nuk është rasti i parë i dështimit të AKU-së në mbrojtjen e konsumatorëve. Janë regjistruar edhe skandale të tjera alarmante.
Një nga to ishte shpërndarja e 13.2 ton akulloreje të kontaminuara me oksid etileni, një substancë kancerogjene, në 15 qytete, pa asnjë paralajmërim për konsumatorët. Po ashtu, qumështi dhe dhalla të prishura nga “Lufra” arritën në tavolinat e shqiptarëve, ndërkohë që AKU nuk reagoi.
Një tjetër rast i rëndë ishte ai i mishit të infektuar me salmonelë të importuar nga KFC, ku vetëm një pjesë e vogël e tij u bllokua, ndërsa pjesa tjetër u shërbye dhe u konsumua nga konsumatorët.
Përgjegjësit e AKU-së kanë shmangur çdo përgjegjësi dhe nuk kanë ofruar informacion në lidhje me këto raste, përkundrazi kanë qëndruar në heshtje.
Për më tepër, “Coca-Cola” ka shpërndarë 1.8 milion litra pije të skaduara pa asnjë mbikëqyrje dhe në kundërshtim me procedurat ligjore, ndërsa AKU ka dështuar të ndërhyjë.
Siç po tregohet nga këto raste, AKU ka dështuar sistematikisht në ruajtjen e sigurisë ushqimore dhe mbrojtjen e shëndetit të qytetarëve.
Dështimi i vazhdueshëm i institucioneve të ngarkuara me këtë përgjegjësi mund të ketë pasoja të rënda për shëndetin publik, dhe kjo heshtje mund të kthehet në një kërcënim të rrezikshëm për jetën e qytetarëve.
