Teksa duket se Shqipëria po e përballon shumë mirë situatën e shkaktuar nga koronavirusi mjekët kanë hamendësuar se kjo javë mund të jetë java kur kurba të arrijë pikun e më pas rastet të ulen.
Këtë e ka rikonfirmuar edhe Pëllumb Pipero, i cili në një lidhje me Skype për News24 ka bërë një parashikim optimist për situatën, duke thënë se kjo javë do të jetë dhe piku i pandemisë në vend dhe se javën e tretë të prillit numri i rasteve mund të bjerë.
Pipero tha se në Infektiv gjendja është normale, e qëndrueshme dhe, pavarësisht problematikave, situatën po e përballojnë me përkushtim e profesionalizëm.
Sakaq, mjeku renditi 3 arsye rreth situatës optimale në të cilën ndodhet vendi ynë:
- Masat e qeverisë.
- Profesionalizmi dhe përkushtimi i mjekëve.
- Respektimi i masave dhe këshillave nga qytetarët.
“Pritshmëritë tona janë kaluar me rastet e shëruara. Kemi 60-70 të shëruar dhe është një arritje e madhe. Falë masave të marra nga qeveria dhe respektimit nga ana e qytetarëve të masave higjieno-personale, pasojat e pandemisë për fat të mirën uk arritën atë kurbën me majë, të papërballueshme nga strukturat e shëndetësie. E kemi përballuar më së miri deri tani. besoj kështu do shkojë. Besoj që kjo javë do jetë java që tek ne duhet të arrijë pikun, pra numrin e rasteve të reja me COVID. Java tjetër do vijojë me këto ritme dhe në fillim të javës së tretë të prillit, numri i rasteve do bjerë. Krahas rënies së numrit shpresoj të zbuten dhe masat e qeverisë, të fillojë një rigjallërim. Piku besoj do jetë kjo javë”, deklaroi Pipero.
Ndërsa, sa iu përket rasteve me COVID-19 tek moshat e reja, ai tha se janë 3-4 të tillë që sigurisht janë infektuar nga kontaktet, teksa përsëriti thirrjen për të qëndruar brenda.
“Unë si ju ndjek me vëmendje buletinin e MSH. Janë 3-4 raste tek moshat e reja. Kjo sëmundje ka një periudhë inkubacioni shumë të gjatë. Jo të gjithë rrinë në shtëpi, dikush del. Mjafton të ketë dalë para 2 javësh, 10 ditësh, përmes kontakteve të afërta, dikush e ka marrë. Ndaj vijojmë të themi mos dilni nga shtëpia. Ky virus i prek të gjithë, nuk bën përjashtime”, tha Pipero.
Ndërkohë numri i personave të infektuar në vendin tonë ka shkuar në 277 persona, pasi në 24 orët e fundit janë identifikuar 18 raste të reja nga 96 testime të kryera.
Në total deri më tani janë kryer 1919 testime, nga të cilët 277 kanë rezultuar pozitiv, teksa Ministria e Shëndetësisë bën me dije se ka ndërruar jetë edhe një person tjetër mëngjesin e sotëm, duke e çuar numrin e viktimave në 16.
Një 78-vjeçar nga Durrësi humbi jetën sot, teksa mësohet se ishte intubuar prej tre ditësh.
Numri i fëmijëve të prekur ka shkuar në 8 dhe gjendja e tyre është e stabilizuar dhe gjithashtu gjatë 24 orëve të fundit janë shëruar edhe 9 persona të tjerë, duke e çuar numrin në 76.
