Si shumë amerikanë të tjerë, edhe unë kisha gjithmonë ëndërruar të jetoja në Evropë. Në vitin 2015, në moshën 35-vjeçare, vendosa të largohesha nga Teksasi dhe të filloja një jetë të re në Spanjë. Dy vite më vonë, themelova “She Hit Refresh”, një komunitet që ndihmon gratë mbi 30 vjeç të ndërmarrin sfidën e jetesës jashtë Shteteve të Bashkuara. Që atëherë, kam mbështetur qindra gra në ndërtimin e jetës së tyre në vende si Portugalia, Spanja, Franca, Italia dhe Holanda.
Një destinacion që po fiton gjithnjë e më shumë vëmendje mes amerikanëve është Shqipëria, një vend që shumë nuk e njohin ende, por që po bëhet më i popullarizuar çdo ditë. Në vitin 2024, kam kaluar një muaj në Shqipëri, kryesisht në Tiranë dhe në bregdet, për të zbuluar vetë se çfarë e bën këtë vend kaq të veçantë.
Shqipëria mund të mos jetë e përshtatshme për të gjithë, por për shumë amerikanë që kërkojnë një stil jetese ekonomik dhe cilësor, është një zgjidhje ideale. Një nga avantazhet më të mëdha është çmimi i jetesës, shumë më i ulët se në qytetet amerikane.
Për shembull, një apartament i rehatshëm me dy dhoma gjumi në Tiranë kushton më pak se 500 dollarë në muaj, një kosto që në Kaliforni do të paguhej për një shtëpi shumë më të vogël.
Gjithashtu, ushqimi, shërbimet shëndetësore dhe jetesa në përgjithësi janë më të përballueshme, duke e bërë Shqipërinë tërheqëse për nomadët digjitalë dhe pensionistët që kërkojnë një cilësi jete më të lirë se ajo në shumë vende të SHBA-së.
Një tjetër përparësi e madhe është mundësia që amerikanët të qëndrojnë në Shqipëri pa nevojën e një vize për deri në 12 muaj, një lehtësi e rrallë në Evropë. Kjo ofron mundësinë për të provuar jetën jashtë vendit pa përballur burokracitë e komplikuara. Për qëndrime më të gjata, ekzistojnë organizata si “Expats in Albania” që ndihmojnë emigrantët me proceset ligjore.
Peizazhet shqiptare janë një tjetër arsye pse ky vend po tërheq emigrantë nga SHBA-ja. Nga malet e larta në veri, deri te plazhet e bukura përgjatë detit Adriatik dhe Jon, Shqipëria ofron një natyrë të mrekullueshme dhe aktivitete për të gjitha shijet.
Gjatë vizitës sime, kam udhëtuar përgjatë Rivierës Shqiptare dhe kam vizituar qytetin e Sarandës, ku plazhet e qeta dhe pamjet spektakolare e bëjnë këtë zonë një perlë të pazbuluar.
Për më tepër, shqiptarët janë të njohur për mikpritjen e tyre. Pavarësisht nga historia e izolimit nën regjimin komunist deri në vitet ’90, sot vendi po hapet më shumë ndaj turizmit dhe emigrantëve, duke krijuar një ambient ku të huajt ndihen të mirëpritur dhe mund të ndërtojnë komunitete të forta.
Në qytete si Tirana dhe Vlora, po formohen gjithnjë e më shumë komunitete të të huajve që kanë zgjedhur Shqipërinë si shtëpinë e tyre të re. Monica Miranda, një amerikane nga Nju Xhersi, tregon se si u ndje e tërhequr menjëherë nga vendi dhe se si ka ndërtuar një rrjet mbështetës me emigrantë nga SHBA-ja, Britania, Australia dhe Amerika Latine.
Edhe nëse Shqipëria nuk është vendi i parë që vjen në mendje kur flitet për emigrim, për shumë amerikanë që kam takuar, ky vend është bërë zgjedhja perfekte në momentin e duhur.
