Regjisori Petri Bozo është arrestuar nga policia pas aksidentit tragjik të ndodhur mëngjesin e së hënës në Elbasan, ku humbi jetën një fëmijë 7-vjeç.
Sipas informacioneve paraprake, autoritetet dyshojnë se automjeti i drejtuar nga Bozo lëvizte me shpejtësi, pavarësisht deklarimit të tij se nuk po udhëtonte shpejt në momentin e përplasjes fatale.
Ngjarja e rëndë u regjistrua rreth orës 08:00 në aksin nacional “Elbasan-Librazhd”, në fshatin Mengël, pranë shkollës 9-vjeçare “Sulejman Rranci”. Automjeti i drejtuar nga regjisori përplasi 7-vjeçarin, i cili humbi jetën si pasojë e plagëve të marra.
Sipas dëshmive nga vendngjarja, i mituri kishte shoqëruar motrën në shkollë bashkë me nënën e tij, ndërsa vetë zhvillonte mësimin pasdite. Në momentin e ngjarjes, nëna dhe djali po drejtoheshin drejt një dyqani pranë shkollës, kur fëmija dyshohet se i ka shpëtuar nga dora së ëmës dhe ka prerë rrugën e automjetit.
Policia ka nisur hetimet për zbardhjen e plotë të rrethanave të aksidentit tragjik.
