Përmbytjet katastrofike që goditën Teksasin kanë lënë pas një bilanc të rëndë, 51 persona të vdekur, përfshirë 15 fëmijë, ndërsa 27 vajza të mitura raportohen ende të zhdukura.
Sipas BBC, reshjet e rrëmbyeshme kanë shkaktuar përmbytje të menjëhershme, pasi lumi Guadalupe ka dalë nga shtrati duke përfshirë me ujë zona të gjera.
Qarku më i prekur është ai i Kerr-it, ku janë shënuar 43 viktima. Shumë prej tyre ishin pjesë e një kampi veror të krishterë vetëm për vajza, i quajtur “Camp Mystic”, i vendosur përgjatë brigjeve të lumit Guadalupe. Vajzat, shumica nën moshën 12 vjeç, ndodheshin në gjumë kur uji u ngrit me shpejtësi dramatike – mbi 8 metra brenda vetëm 45 minutash.
Zëvendësguvernatori i Teksasit, Dan Patrick, deklaroi se kampi është shkatërruar thuajse plotësisht, dhe ka shprehur shqetësimin për fatin e vajzave që ende nuk janë gjetur. Sipas tij, kjo përmbytje ishte një nga më të shpejtat dhe më shkatërrimtaret që ka përjetuar ndonjëherë zona.
Ndërkohë, viktima janë konfirmuar edhe në qarqet Travis dhe Tom Green. Deri tani, rreth 850 persona janë shpëtuar nga zonat e përmbytura, por dhjetëra të tjerë vazhdojnë të rezultojnë të humbur, përfshirë pushues që ndodheshin në zonë për fundjavën e 4 Korrikut.
Në një konferencë për shtyp, Guvernatori Greg Abbott bëri të ditur se ka nënshkruar një zgjatje të gjendjes së emergjencës, ndërsa Presidenti Donald Trump deklaroi se administrata po bashkëpunon ngushtë me autoritetet lokale për përballimin e situatës.
Sekretarja e Sigurisë Kombëtare, Kristi Noem, njoftoi se do të dislokohet Roja Bregdetare për të ndihmuar në kërkim-shpëtimin.
Shërbimi Meteorologjik Amerikan ka paralajmëruar se reshjet intensive mund të vijojnë edhe gjatë fundjavës, duke rritur rrezikun për përmbytje të reja në zonën qendrore të Teksasit.
