Pas një fillimi zhgënjyes në garat europiane, ku Egnatia u eliminua që në turin e parë të Champions League dhe Partizani u largua po aq shpejt nga Conference League, ekipet shqiptare kanë reaguar fuqishëm në raundin e dytë të Conference League.
Të tre skuadrat e mbetura në garë, Egnatia, Dinamo dhe Vllaznia, kanë regjistruar fitore të rëndësishme në ndeshjet e para.
Egnatia dhe Dinamo arritën triumfe në transfertë, ndërsa Vllaznia zhvilloi një përmbysje mbresëlënëse në Shkodër ndaj islandezëve të Vikingur Reikjavikut.
Këto rezultate jo vetëm që japin shpresë për kualifikim në fazën tjetër, por edhe ndikojnë pozitivisht në renditjen e përgjithshme të Shqipërisë në UEFA.
Me 1.375 pikë të grumbulluara deri tani, Shqipëria ndodhet mes vendeve me koeficientin më të lartë për këtë fazë të kompeticioneve europiane. Kjo është thelbësore për të ruajtur të drejtën e katër pjesëmarrësve në Europë në sezonet e ardhshme.
Vëmendja tani është e përqendruar te ndeshjet e kthimit, ku Egnatia, Dinamo dhe Vllaznia duhet të ruajnë nivelin e paraqitjeve për të çuar përpara jo vetëm ambiciet e tyre, por edhe të ardhmen e përfaqësimit shqiptar në arenën ndërkombëtare.
