Detaje të reja janë zbuluar nga dosja hetimore e operacionit të koduar “URA”, ku një ndër episodet më të rëndë lidhet me një përpjekje të dyshuar për manipulim të provave brenda laboratorit të Policisë Shkencore.
Sipas dokumenteve të SPAK, më 24 shtator 2020, Ekil Nderjaku, i identifikuar si përdoruesi i pajisjes me PIN-in SPNNS9 në aplikacionin e enkriptuar Sky ECC, zhvillon një bisedë me një tjetër person me PIN DFEFF, i cili ende nuk është identifikuar. Në komunikimin e zbardhur, diskutohet një tentativë për të kontaktuar efektivin e policisë Altin Morina.
Ky i fundit përshkruhet si një person me lidhje të forta me zyrtarë të lartë të Policisë së Shtetit dhe përmendet për rolin e mundshëm në ndërhyrjen në analizën balistike të një arme të sekuestruar.
Qëllimi i ndërhyrjes ishte të manipulohej rezultati i ekspertizës, konkretisht të “prishej gjilpëra”, një term i përdorur për të përshkruar devijimin e qëllimshëm të të dhënave balistike që identifikojnë armën si mjet krimi.
Përgjimet e publikuara në dosje janë si më poshtë:
DFEF3F – “O shok a fol dot me altinin se kan nalu ceken me arm me duket, ..o… me ja prish gilponen … te laboratori ne tr..”
SPNNS9 – “Kur e kan nalu sot…”
DFEF3F – “po vlla sot….”
SPNNS9 – “Ja i shkr sa tpergj…”
DFEF3F – “ok shok….”
Sipas të dhënave hetimore, personi i përmendur me nofkën “Çeke” dyshohet të jetë Mond Çekiçi, i cili në atë kohë ndodhej nën hetim për armëmbajtje pa leje dhe më pas u ekzekutua në mars të vitit 2021 në një atentat mafioz në Durrës.
Gjithashtu, në një bisedë tjetër në Sky ECC, përdoruesit diskutojnë mundësinë për të ndërhyrë përmes kontakteve në polici, me qëllim shmangien e përgjegjësisë penale për Çekiçin:
Kodi – “0 shokkot me pyt …A kemi naj nji me rregullu atje tr kur tkapin me arm…Kan kap i shok a mun ti regullojm pun e giilpons… Sosht mo atje ai shoku jot qe patm fol iher… Sa tjet goka …Sot … E kan kap…”
Kodi2 – “kur e kan kap dhe si e ka emrin…por do pyes nje shok tjeter … po po e marr… vesh kush eshte robi…”
Kodi – “Mond Cekici..”
Kodi2 – “ne tiran e kan kap apo durres …”
Kodi – “Ktu ne dr…”
Kodi2 – “ok.”
