Ka përfunduar marrja në pyetje nga SPAK e ish-deputetit socialist Jurgis Çyrbja dhe bashkëpunëtorit të tij, Ahmet Masha, në kuadër të hetimeve lidhur me përdorimin e aplikacionit Sky Ecc dhe lidhjet e mundshme me grupe kriminale në Durrës.
Gjatë marrjes në pyetje, Jurgis Çyrbja mohoi akuzat që rëndonin mbi të dhe deklaroi se nuk ka pasur kurrë aplikacionin Sky Ecc dhe nuk ka komunikuar me individë të përfshirë në aktivitete të paligjshme.
“Nuk kam patur kurrë aplikacion Sky Ecc dhe nuk jam unë ai që kam komunikuar me ata njerëz. Nuk kam përkrahur asnjë person në kërkim, as nuk kam strehuar,” – tha Çyrbja
Nga ana tjetër, Ahmet Masha, i pyetur për përdorimin e aplikacionit Sky Ecc, mohoi përdorimin e një platforme të tillë dhe gjithashtu mohoi akuzën për “tregimin e sekretit shtetëror nga shtetasit”.
Avokati i Mashës theksoi se nuk ka prova që të tregojnë se klienti i tij ka shpërndarë informacione të klasifikuara, duke theksuar se mungon një ekstrakt që të tregojë se informacionet janë dërguar nga klienti i tij.
