Këtë të premte në Shkodër u zhvilluan homazhe në nderim të kapitenit Arben Anamali, i cili humbi jetën tragjikisht më 8 korrik në ujërat e Liqenit të Shkodrës, ndërsa po përpiqej të shpëtonte dy turistë të huaj.
Për familjen, miqtë dhe kolegët e tij, kjo ditë shënon një dhimbje të thellë. Bashkëshortja e të ndjerit, Najada Anamali, tregoi për momentin kur mori lajmin e rëndë:
“Është një dhimbje e madhe për të gjithë familjen tonë, për nanën, mua, për fëmijët. Për të gjithë që e kanë njohur, sepse ka qenë një njeri shumë i mirë dhe i përkushtuar. Dha jetën për të shpëtuar të tjerët. Më mori një kolege e tij dhe më tha që kishte ndodhur një aksident. Mendova se ishte një dëmtim i lehtë, nuk ma priste mendja kurrë se ishte mbytur, sepse ishte shumë i fortë fizikisht dhe notar i zoti.”
Si ndodhi ngjarja
Pesë turistë izraelitë, të cilët po lundronin bashkë me të tjerë në anijen e drejtuar nga kapiteni Arben Anamali, u hodhën në ujërat e Liqenit të Shkodrës për t’u larë dhe më pas kërkuan ndihmë për t’u shpëtuar.
Kapiteni reagoi menjëherë dhe arriti të nxirrte nga uji tre prej tyre, ndërsa disa metra më tej shpëtoi edhe dy turistët e tjerë që rrezikonin të mbyteshin.
Gjatë përpjekjes për t’i shpëtuar ata, kapiteni 51-vjeçar, Arben Anamali, u mbyt.
Dyshohet se Anamali pësoi arrest kardiak si pasojë e stresit dhe lodhjes ekstreme.
Pas dy ditësh kërkimesh intensive, trupi i tij u gjet të enjten nga polumbarët dhe u transportua në morgun e spitalit rajonal të Shkodrës për ekspertizë mjeko-ligjore.
Kapiteni Arben Anamali la pas bashkëshorten dhe dy fëmijët. Ai vinte nga një familje shkodrane me traditë në lundrim. Edhe i ati i tij kishte qenë mjeshtër i mjeteve ujore. Njohës i mirë i liqenit dhe notar i stërvitur, Anamali u hodh në ujë pa hezitim, duke u bërë shembull i kurajos dhe sakrificës njerëzore.
Ai u përcoll për në banesën e fundit mes nderimesh, si një hero i heshtur që dha gjithçka për të shpëtuar jetën e njerëzve.
