Për gati 12 orë, GJKKO zhvilloi dje seancën për vlerësimin e masës së sigurisë për Erion Veliajn, bashkëshorten e tij Ajola Xoxa dhe disa biznesmenë, mes tyre Elman Abule, i cili ndodhet në arrest.
Gjykata vendosi të lërë në fuqi masat e sigurisë, me përjashtim të Ajola Xoxës, e cila nga “arrest shtëpie” kaloi në “detyrim paraqitje”, ndërsa iu ndalua dalja jashtë shtetit dhe iu sekuestrua pasaporta.
Gjatë seancës, një debat i ashpër u zhvillua mes Erion Veliajt dhe prokurorit Olsi Dado.
Veliaj e akuzoi prokurorin për konflikt interesi, duke pretenduar se Dado kishte kërkuar më parë leje ndërtimi në Bashkinë e Tiranës dhe ishte mbetur i pakënaqur.
Prokurori Olsi Dado iu përgjigj duke pranuar se një ndërtues kishte marrë leje për zhvillimin e një prone të nënës së tij në Tiranë, por ai e kishte falënderuar Veliajn për këtë.
Ai hodhi poshtë pretendimet se kishte kërkuar kate shtesë apo kishte qenë i pakënaqur me procesin.
Në përfundim, Veliaj e cilësoi situatën si një “pabarazi”, ndërsa procesi vijon me hetimet për pasurinë dhe lidhjet e tij me biznese dhe organizata të ndryshme.
