Kryetari i Partisë Demokratike, Lulzim Basha, zhvilloi ditën e sotme një takim elektoral në Malësi të Madhe. Gjatë takimit që pati me përfaqësuesit e shoqatës së Bimëve Mjekësore , Basha ka folur mbi çështjen “Becchetti”, sipërmarrësin italian të cilit Shqipëria duhet ti paguajë një dëmshpërblim prej 110 milionë euro.
Kryedemokrati Basha tha se kjo ndodhi për shkak të qëndrimeve të televizionit ndaj qeverisë. Basha u shpreh se transparenca e plotë do të tregojë përse u veprua kështu dhe kush janë ata që kanë përfituar nga kjo çështje. Ndër të tjera Basha është shprehur se e merr si shembull këtë rast sepse ë njëjta gjë ndodh në çdo sektor sipas tij.
“Për të favorizuar veten e tyre, propagandën e tyre, apo mjetet e propagandës së tyre, mbyllën një televizion dhe tani Shqipërisë i duhen të paguajë 110 milionë euro dëmshpërblim Becchetti-t. Për tekat e Edi Ramës dhe Erion Veliajt. 110 milionë euro, është dyfishi i asaj që prodhoni ju në vit. Pse ndodhi, sepse ai televizion ishte kritik me qeverinë, dhe e dyta sepse mjetet e propagandës qeveritare…Do dalin, transparenca e plotë e vendimit do e tregojë pse kemi mbërritur në këtë pikë, pse u veprua kështu, dhe kush janë aktorët që kanë përfituar. Pse e marr si shembull, se e njëjta gjë ndodh në çdo sektor”, tha Basha.
