Policia ka arrestuar një 36-vjeçar, i cili dyshohet të jetë një nga autorët e ngjarjes së ndodhur në zonën e Astirit, ku një 21-vjeçare, Sajma Qordja, u mbajt e mbyllur në një apartament nga disa persona.
Ky shtetas, në bashkëpunim me të tjerë, ka marrë pjesë në mbajtjen e vajzës të mbyllur. Ishte vetë 21-vjeçarja që denoncoi ngjarjen në polici.
Kur ajo nuk hapi derën, u kërkua ndërhyrja e forcave speciale për të futur në apartament.
Gjatë kontrollit, u gjetën armë zjarri, qese me shishe alkooli, pije energjike dhe një mjet identifikimi.
Ndërkohë, vijon puna për kapjen e të tjerëve të shpallur në kërkim për këtë ngjarje.
Njoftimi:
Si rezultat i hetimeve intensive, bazuar dhe në informacionet e marra falë inteligjencës policore, nga Strukturat e DVP Tiranë, u bë kapja dhe ndalimi i shtetasit Ermal Binjaku, 36 vjeç, banues në Tiranë, me precedent të mëparshëm penal.
Ndalimi i këtij shtetasi u bë pasi në bashkëpunim me shtetas të tjerë të shpallur në kërkim, kanë mbajtur të mbyllur shtetasen S. Q., në një apartament në “Astir” me datë 09.01.2025, në Astir.
Vijon puna për kapjen e shtetasve të tjerë të shpallur në kërkim.
Gjithashtu, vijojnë hetimet në bashkëpunim me Prokurorinë, për dokumentimin e plotë ligjor të ngjarjes dhe identifikimin e personave të tjerë që mund të jenë përfshirë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë për veprime të mëtejshme.
