Ditën e sotme, ministri i Mbrojtjes Niko Peleshi ka bërë një komunikim të rëndësishëm për qytetarët. Ai ka bërë të ditur se në ditët në vazhdim në pjesën veriperëndimore do të ketë reshje me intesitet mesatar dhe të lartë. Peleshi ka sqaruar se kjo nuk është një situatë alarmuese, por duhet të mobilizohemi për të mos pasur emergjenca. Ndër të tjera ka theksuar se shkarkimet nga kaskadat do të jenë 0 dhe se përmbytjet do të jenë lokale.
“Po shfrytëzoj këtë komunikim publik për të njoftuar në kohë jo për alarm, por për të pasur më shumë vëmendje. Duke filluar nga sot pas mesditës dhe gjatë gjithë javës në pjesën veriperëndimore të vendit rreth Shkodrës, por edhe duke u përhapur edhe në pjesën tjetër të vendit do të kemi rritje të intensitetit të reshjeve, do të jenë me intensitet mesatar, por deri diku edhe të lartë. Duhet të shmangim emergjencat që në këtë rast do të jenë lokale. Nuk favorizohen përmbytje. Kaskada është e menaxhuar. Në këtë rast shkarkimet do të jenë 0. Intensiteti i përqendruar në kohë i reshjeve mund të shkaktojë ndonjë situatë që mund të bëhet shkak i përmbytjes lokale.
Duhet të ketë mobilizim, duhet të shmangin lëvizjet pranë përrenjve dhe duhet të njoftojnë kur ka raste të ndonjë rrëshqitjeje apo situata të tjera”, është shprehur Peleshi.
