Ministri i Mbrojtjes, Niko Peleshi, ka njoftuar se gjatë orëve të vona të natës është rrezikuar baza ushtarake e Pashalimanit, për shkak të një zjarri të rindezur në mesnatë. Sipas ministrit, zjarri afër zonës është vënë nën kontroll rreth orës 20:00 mbrëmjen e djeshme, por ka rifilluar sërish në orët e para të mëngjesit. Gjithashtu, Peleshi ka shprehur edhe ngushëllimet për viktimën që humbi jetën si pasojë e zjarrit në Gjirokastër.
“Ngushëllim për familjen e të ndjerit. Jemi përpjekur që të mos ketë viktima. Zjarri ka rrethuar fshatin, ka qenë një largësi 100 metra, por ja kemi ndalë. Dy helikopterë kanë punuar edhe natën dhe jemi gdhirë në një situatë të qetë.
Ka vetëm vatra të vogla që po i eliminojmë. Vijmë këtu në Vlorë, ku ka qenë e mundimshme nata në Pashaliman. Rreth mesnatës, ka shpërthyer një zjarr i madh sipër Pash Alimanit. Rreth orës 4 është shmangur më e keqja. Bëhet fjalë për një bazë ushtarake.
Vatra më serioze është Karaburuni. Dje kemi shmangur zjarrin nga drejtimi i banesave. Është djegur një sipërfaqe e malit dhe rreziku më i madh duhet që të mos preket Llogaraja. Aktualisht kemi 3 helikopterë. Kemi kërkuar ndihmë. Italisë, Turqisë, Cekisë… Holanda është përgjigjur në mënyrë shumë bujare. Sot presim që të dërgojnë një grup dhe të flasin si do na mbështesin”, u shpreh Peleshi.
