Një tjetër aksident është regjistruar në minierën e Bulqizës këtë të mërkurë, ku një minator 40-vjeçar, me inicialet A.N., ka mbetur i plagosur teksa punonte në një nga galeritë e kromit të kompanisë “ACR”.
Sipas burimeve, ai është goditur nga një masiv gurësh ndërsa ndodhej në thellësi të galerisë.
Pas incidentit, i lënduari është transportuar fillimisht në spitalin bashkiak të Bulqizës, ku mori ndihmën e parë, dhe më pas u dërgua në Spitalin Rajonal të Dibrës për trajtim më të specializuar.
Mjekët konfirmojnë se gjendja e tij është e qëndrueshme dhe jashtë rrezikut për jetën.
Ngjarja në Bulqizë ndodh vetëm pak ditë pas një tjetër aksidenti tragjik në Përrenjas, ku një minator humbi jetën në galeri. Aksidentet në minierat shqiptare po bëhen gjithnjë e më të shpeshta, me bilance që shpesh përfundojnë në viktima.
Një tjetër rast tronditës ndodhi në Klos, ku trupi i Ardit Beshirit, 29 vjeç, u gjet më 9 maj pas shtatë ditësh kërkimesh.
I riu kishte humbur jetën më 3 maj, pasi fadroma që po drejtonte u përfshi nga një masiv dheu në një stog minerali në zonën e Qafë-Burrelit.
Pavarësisht rasteve të përsëritura dhe pasojave të rënda, masat për garantimin e sigurisë në punë në minierat shqiptare mungojnë.
Aksidentet vijojnë, dhe jeta e minatorëve mbetet e ekspozuar ndaj rrezikut çdo ditë. Në një industri ku puna zhvillohet në kushte ekstreme, mungesa e mbrojtjes ligjore dhe teknike po i kthen galeritë në varre të hapura.
