Në SHBA tashmë aborti është i ndalur, si pasojë e një vendimi që u mor nga Gjykata e Lartë.
Klinikat e abortit kanë nisur të mbyllen në disa shtete amerikane, pas vendimit të Gjykatës Supreme të premten, i cili ndalon të drejtën për një procedurë të tillë.
Rreth gjysma e shteteve amerikane pritet që të prezantojnë kufizime të reja apo ndalesa, pas vendimit të gjykatës për të përmbysur vendimin e marrë 50 vjet më parë për abortin
Ndërkohë presidenti amerikan, Joe Biden, e ka përshkruar vendimin si “gabim tragjik”. Menjëherë pas vendimit kanë nisur protesta në rajone të ndryshme të Shteteve të Bashkuara. Në Feniks të Arizonas, policia ka hedhur gaz lotsjellës, pasi protestuesit që kanë marshuar për të drejtën e abortit, kanë trokitur nëpër dyert dhe dritaret e institucioneve shtetërore.
Në New Orleans protestuesit kanë bllokuar për pak kohë trafikun në autostradë. Një klinikë e abortit në Arkansas ka mbyllur dyert për pacientët, pas vendimit të publikuar nga gjykata. Stafi i klinikës ka telefonuarpacientet për t’iu komunikuar se takimet janë anuluar.
Ndërkohë një protestues kundër abortit, prifti protestan, Bill Shankes, ka thënë se e premtja për të është “ditë feste”. Vendimi i Gjykatës Supreme nënkupton se rreth 36 milionë gra në moshë riprodhimi do të humbin të drejtë për të abortuar.
Vendimi kundër abortit është pranuar me entuziazëm nga personat që kanë qenë kundër kësaj procedure, të cilët kanë dalë jashtë ndërtesës së Gjykatës Supreme në Washington për të festuar. Mirëpo protestat kundër vendimit janë mbajtur në më shumë se 50 shtete në SHBA.
Ndonëse kjo çështje krijon ndasi në SHBA, një hulumtim i kryer së fundi ka gjetur se 61% e të rriturve kanë thënë se aborti duhet të jetë i ligjshëm në shumicën e rasteve apo vazhdimisht, derisa 37% e përgjigjeve janë shprehur se aborti duhet të jetë joligjor në shumicën e rasteve apo vazhdimisht. Vendimi i së premtes përbën përmbysje të vendimit të marrë nga vetë Gjykata Supreme – një veprim jashtëzakonisht i rrallë – dhe pritet të nxisë beteja politike që mund të përçajnë SHBA-në.
Disa protestuese kanë marshuar me mbishkrimet “Aborti është kujdes shëndetësor”, “Trupi im, vendimi im”./REL
